GR: Góð mæting á reglukvöldi

Það var gaman að sjá hversu margar GR konur sáu sér fært að mæta á reglukvöld okkar í Grafarholtinu þegar þeir Hinrik G Hilmarsson og Þorsteinn Svörfuður yfirdómarar GR og alþjóðlegir dómarar kynntu breytingar sem orðið hafa á golfreglum og tóku gildi um síðustu áramót.

Aðalefni fundarins var leikhraði á golfvellinum.

Leikhraði er stærsta vandamálið í golfheiminum í dag. Rúmlega 5 klst golfhringir samræmast ekki lengur lífstíl fólks, við höfum einfaldlega ekki tíma í þessa viðveru á golfvellinum. Í auknum mæli er fólk allt í kringum okkur að gefast upp á íþróttinni vegna þess hversu langan tíma tekur að stunda hana.

Úr þessu verður að bæta og á þessu verður tekið, hér heima eins og gert hefur verið   í löndunum allt í kringum okkur.

Þeir Hinrik og Þorsteinn fóru yfir þær reglur sem settar hafa verið varðandi leikhraða í Bandaríkjunum, Kanada og Skandinavíu og kynntu hvernig reglurnar verði hér á landi þegar golfvellir opna nú þegar vora tekur:

„Ef viðvörun dugir ekki og leikhraði eykst ekki, þá er bara að taka upp boltann og fara á næsta teig.“

Skilaboðin eru skýr. Hinrik og Þorsteinn boða hertar aðgerðir varðandi leikhraða.

Og hvernig má bæta úr og auka leikhraðann?

Jú, spila  „ready to play“ golf, minnka spjallið á vellinum, hugsa fram fyrir okkur, ganga rösklega að boltanum á milli högga, ákveða hvaða kylfur á að nota á meðan meðspilarar slá, hvar skiljum við kerruna eftir við flötina, þurfum við að labba til baka til að ná í hana? Hleypa fram úr á braut þegar bolti er týndur osfrv. Allt þetta telur í baráttu við tímann. Umfram allt, halda í hollið fyrir framan okkur!

Heimild: grgolf.is