Evróputúrinn: Farangri Cabrera-Bello stolið

Kylfingar ferðast um heiminn og ferðalögin geta verið löng og nógu erfið þó ekki bætist á farangursþjófnaður eins og aumingja Rafa Cabrera-Bello, sem er frá Gran Kanaría, varð fyrir.

Hann varð að taka á sig krók á leið sinni á Maybank Malaysia Open eftir að töskum hans var stolið á leið á flugvöllinn.

Rafa varð að ferðast til London og þaðan til Madrid og svo aftur til London áður en hann komst um borð í 13 klst. flugið sitt til Kuala Lumpur og þetta var þeim mun sársaukafyllra þar sem mikið af persónulegum eigum hans þ.á.m. passanum var stolið.

„Ég var í lest frá heimili mínu í Sviss og á flugvöllinn þegar töskunum var stolið – þannig að allar persónulegar eigur mínar, passinn, peningar, kreditkort, tölvan, myndavélin, ipad-inn – öllu var stolið,“ sagði Cabrera-Bello. „Ég hafði mestu áhyggjurnar af passa-stuldinum.“

„Ég gat flogið til London þennan sama morgun þar sem ég var með spænsk skilríki á mér en í London var mér bent á að öruggara væri að ég færi til Spánar þar sem þetta var á sunnudegi og spænska sendiráðið lokað. Jafnvel þó þeir hefðu gefið út vegabréf hefði það ekki verið vegabréf með nýju örflögunni (ens.: chip)  og ég þarf að fá svoleiðis vegabréf, þannig að ég varð að fara til Madrid og útvega nýtt vegabréf.“

„Ég flaug tilbaka til London þetta sama kvöld, var þar 1 nótt og flaug til Malasíu mánudagskvöldið og kom seint á þriðjudaginn. Þetta var svolítið stress  vegna þess að ekki aðeins er þetta langt flug; ég var líka á ferðalagi allan daginn þar á undan – stressaður allan tímann vegna þess að ég vissi ekki hvort ég myndi ná þessu.“

„Ég missti allt – myndirnar mínar, tónlistina, adressubókina. Back-up-ið úr símaskránni var í tölvunni. Þetta var erfitt en ég vona að þetta verði það eina slæma í þessari viku.“

Þrátt fyrir allt stressið er Rafa búinn að spila hringi upp á 72 og 67 högg á Maybank Malaysia Open.

„Þetta er einn af uppáhaldsgolfvöllunum mínum og ég hlakka til þessarar viku allt árið,“ bætti Cabrera-Bello við að lokum. „Ég hef verið meðal efstu 5 hér tvívegis og á góðar minningar héðan.“