LPGA: Jane Park leiðir eftir 1. dag Kia Classic – Yani Tseng svaf yfir sig og vísað úr mótinu

Það er bandaríski kylfingurinn Jane Park, sem leiðir eftir 1. dag Kia Classic mótsins, sem hófst í gær á golfvelli Aviara golfklúbbsins í Carlsbad, í Kaliforníu.

Jane Park spilaði á samtals 6 undir pari, 66 höggum á hring þar sem hún fékk 6 fugla og 12 pör.

Sumum kemur eflaust á óvart að Jane Park sé efst í mótinu, sem skartar öllum helstu stjörnum kvennagolfsins – en góður árangur Jane skýrist e.t.v. af því að hún er eiginlega á heimavelli, þar sem hún spilaði í 4 ár í bandaríska háskólagolfinu með UCLA (University of California, Los Angeles) og er e.t.v. sá keppandi sem þekkir Aviara golfvöllinn best.

Öðru sætinu deila vinkona og fyrrum liðsfélagi Eyglóar Myrru Óskarsdóttur, GO – hin sænska Caroline Hedwall og ástralska golfdrottningin Carrie Webb. Báðar eru þær höggi á eftir Jane Park, þ.e. léku á 5 undir pari 67 höggum, hvor.

Sjötta sætinu deila hvorki fleiri né færri en 12 kylfingar; allir á 4 undir pari, 68 höggum, en þeirra á meðal er önnur heimakona, bleiki pardusinn, Paula Creamer.

Heimsins besti kylfingur, Stacy Lewis er sem stendur í 16. sæti á 2 undir pari, 70 höggum …. og fyrrum nr. 1 Yani Tseng var vísað úr mótinu í gær vegna þess að hún svaf yfir sig og missti af Pro-Am hluta mótsins.   Í blaðaviðtali sagðist Yani m.a. skammast sín, en hún er nú á fullu að æfa sig fyrir fyrsta risamót kvennagolfsins: Kraft Nabisco Championship, sem fram fer á Rancho Mirage þ. 4.-7. apríl n.k.

Til þess að sjá stöðuna á Kia Classic eftir 1. dag SMELLIÐ HÉR: