Thorbjørn Olesen með mikið sjálfstraust eftir 2. sætið í Abu Dhabi

Kylfingurinn danski Thorbjørn Olesen er, þótt ungur sé að árum, búinn að fá spilareynslu á rismótum golfsins. (Sjá m.a. kynningu Golf1.is á Olesen með því að SMELLA HÉR)

Á s.l. ári spilaði Olesen þannig á Opna breska og varð T-9 (þ.e. jafn öðrum í 9. sæti) og lauk keppni í 27. sæti á PGA Championship.  Olesen getur ekki beðið eftir næsta risamóti.

„Eftir að hafa spilað í þessum risamótum veit ég hvað ég þarfnast til þess að keppa á hæsta stigi (leiksins). Að verða í 2. sæti í Abu Dhabi, meðal leikmanna, sem eru heimsins bestu kylfingar, hefir gefið mér sjálfstraust,“ sagði Olesen.

„Nú hlakka ég til að spila í Bandaríkjunum vegna þess að ég elska stemmninguna sem þeir eru með í hverju móti.“

Bandarískir golfaðdáendur eru vísir til að falla unnvörpum fyrir hinum brosmilda Olesen.

„Að spila á hæsta stigi leiksins mun ekki breyta mér. Ég mun eftir sem áður fara og njóta hvers hrings,“ sagði Olesen.

Þess mætti geta að formaður leikmannanefndar Evrópumótaraðarinnar, Thomas Bjørn, hefir ofurtrú á Olesen, landa sínum en hann lét m.a. hafa eftir sér: „Thorbjørn hefir allt til þess að verða einn af bestu kylfingum heims.“