Hver er kylfingurinn: Cassandra Kirkland?

Franski kylfingurinn Cassandra Kirkland vann í gær fyrsta sigur sinn á LET, þegar hún sigraði á Sanya Ladies Open í Sanya í Kína. Þetta er sjötta árið sem hún spilar á LET og því langþráður sigur hjá henni sem hún vann í gær.

Cassandra Kirkland

Cassandra Elaine Kirkland fæddist 13. október 1984 í París og því nýorðin 28 ára. Hún veit það eflaust ekki en hún á sama afmælisdag og spænski kylfingurinn Gonzalo Fernández-Castaño, sem er 4 árum eldri en hún.

Cassandra byrjaði að spila golf 7 ára og er í þeim fræga franska klúbbi Club Saint Nom La Breteche.  Meðal áhugamála Cassöndru eru íþróttir almennt, lestur góðra bóka, tónlist, að ferðast, eldamennska, að horfa á kvikmyndir, verja tíma með fjölskyldu og fara í ræktina.

Cassandra spilaði golf í bandaríska háskólagolfinu á árunum 2002-2006 með University of Arizona. Hún gerðist atvinnumaður í golfi 1. desember 2006 eftir að hún komst inn á LET þ.e. Evrópumótaröð kvenna í fyrstu tilraun.  Fyrsta keppnistímabilið hennar var 2007.

Sem áhugamaður varð hún m.a. í 2. sæti á British Girls’ Amateur Championship in 2001. Hún var í NGCA All American Team 2005. All-PAC 10 Team 2004 & 2005. Cassandra sigraði á UNLV Invitational árið 2005. Hún hlaut jafnframt verðlaun Golfstat fyrir að vera sá kylfingur sem skoraði best á par-5 brautum árin 2004 og 2005.

Cassandra er skyld Eddie Cheever, sem er bandarískur aksturskappi sem var 30 ár í  Formúlu 1 og í Indy Racing League.  Helstu styrktaraðilar hennar eru NUNI og OAKLEY.

Fylgjast má með Cassöndru á Twitter: @CassieKirkland.