Web.com: Ben Kohles vann 2. mót sitt af 2 – myndskeið

Það er aðeins vika síðan hinn 22 ára Ben Kohles gerðist atvinnumaður í golfi og  frá þeim tíma hefir hann leikið í 2 mótum Web.com mótaraðarinnar, sem áður hét Nationwide mótaröðin og er einskonar 2. deild á eftir 1. deildinni PGA mótaröðinni.

Og viti menn…. hann hefir sigrað bæði mótin þ.e. Nationwide Children’s Hospital Invitational fyrir viku, sem var hans fyrsta mót sem atvinnumaður og nú um helgina Cox Classic mótið.  Hann er fyrstur til að sigra á mótaröðinni í 1. tilraun og þ.a.l. líka sá fyrsti til að vinna fyrstu 2 mótin, sem hann tekur þátt í, á mótaröðinni.

„Ég hugsa að ég hafi spilað besta hring ævinnar í dag. Þetta var frábært,“ sagði hann eftir að hafa hitt 17 af 18 flötum á tilskildum höggafjölda. „Ég er ansi sjokkeraður sjálfur. Hvernig á maður að bæta sig eftir þetta?“

Ben Kohles er með þessum góða árangri búinn að tryggja sér sæti á PGA mótaröðinni á næsta ári en þangað kemst hann vegna þess að hann er sem stendur í 2. sæti peningalista Web.com. – búinn að vinna sér inn $ 261.000.

„Ég held að þennan hluta hafi ég ekki meðtekið enn,“ sagði Kohles. „Þetta breytir ýmsu í lífinu.“

Næsta mót í vikunni á Web.com er  Price Cutter Charity Championship í Springfield og verður spennandi að sjá hvort Kohles takist að taka þrennu, þ.e. sigra þrisvar í röð.

Til þess að sjá úrslit á Cox Classic mótinu á Web.com mótaröðinni SMELLIÐ HÉR: 

Til þess að sjá myndskeið af hápunktum 4. hrings Cox Classic mótsins SMELLIÐ HÉR: