Masters 2022: „Gullni Björninn“ verður ekki með í par-3 keppninni

Íslandsvinurinn, „Gullni Björninn“ og ein af golfgoðsögnunum 3, þ.e. Jack Nicklaus mun ekki taka þátt í hinni frægu par-3 keppni, á Masters risamótinu, sem aftur er á dagskrá í næstu viku, eftir tveggja ára hlé.

„Það er gaman að fara á Masters kvöldverðinn (en) ég spila ekki meir í Par-3 (keppninni),“ sagði Nicklaus í viðtali við Golfweek. „Undir lok ferilsins spilaði ég á hverju ári, en ég get bara ekki spilað lengur.“

Hinn 82 ára Nicklaus tók síðast þátt í Par-3 keppninni 2019, en sá hringur lifir eflaust lengur í minni vegna þess að barnabarn hans, Gary Nicklaus Jr., sem var kylfusveinn fyrir afa sinn, fór holu í höggi.

Hann nýtti tækifæri sitt vel þegar hann fékk tækifæri til að sveifla kylfu í stað þess að bera hana.

Þrátt fyrir að hafa unnið The Masters árið 1963, 1965, 1966, 1972, 1975 og frægan sigur árið 1986, 46 ára að aldri, sagði „Gullni Björninn“  að dagurinn sem Gary, barnabarn hans, fór holu í höggi hefði verið „besti dagur, sem hann hefði átt á Augusta National.“

Par-3 keppnin var ekki haldin árin 2020 eða 2021, vegna COVID-19 heimsfaraldursins.

Nicklaus mun samt nú í ár taka þátt í hefðbundinni athöfn á fyrsta teig og slá heiðursupphafshögg ásamt þeim Gary Player og Tom Watson.