Tiger er nú meðlimur í heimsfrægðarhöllinni

Sam Woods, 14 ára, kynnti föður sinn í gær, 9. mars 2022, við inntöku Tiger Woods í heimsfrægðarhöll kylfinga.

Hún sagði m.a.: „“Stöðug nærvera hans er mikilvægur þáttur í sambandi okkar. Hvort sem það er á FaceTime, þegar hann er að sækja okkur úr skólanum, þegar hann kemur á fiðlutónleika mína eða þegar við erum  að kenna hundunum okkar brellur – hann er alltaf til staðar!„

„Hann er alltaf til staðar.“

Svo var ekki alltaf, en Tiger Woods er nú að ná sér eftir erfitt bílslys, sem hann lenti í í febrúar á sl. ári.

Eitthvað gott hefir slysið gert, því augsýnilega ver Tiger nú mun meiri tíma með börnum sínum.

Tiger tók líka til máls við inntöku sína í heimsfrægðarhöll kylfinga í gær. Hann sagði m.a.:

„Þér er aldrei gefið neitt, allt þarf að vinna sér inn. Ef þú ferð ekki út og leggur þig fram þá nærðu ekki góðum árangri. Þú verður að vinna þér hann inn. Þetta var ráðandi í uppeldi mínu. Þetta skilgreindi feril minn.„

Tiger talaði líka um erfiðleikana sem hann þurfti að yfirstíga, um kynþáttafordóma, sem hann lenti í sérstaklega snemma á ferlinum þegar hann mátti ekki fara inn í sum klúbbhús.

„Húðliturinn á mér réði því. Þegar ég varð eldri rak þetta mig áfram til að gera enn betur,“ sagði Woods, sem talaði blaðlaust.

Sjá má frá athöfninni í gær með því að SMELLA HÉR: 

Í aðalmyndaglugga: Tiger og Sam við inntöku Tigers í heimsfrægðarhöll kylfinga (World Golf Hall of Fame).