Ryder Cup 2021: Hver er nýliðinn í liði Bandaríkjanna – Scottie Scheffler?

Steve Stricker nýtti sér reglur settar vegna Covid-19, sem kveða á um að fyrirliðar Ryder Cup megi í ár velja allt að 8 manns í liðið – Stricker valdi 6, þ.á.m. Scottie Scheffler, sem er að spila í sínu fyrsta Ryder Cup móti.

Scheffler er líklegast sá kylfingur sem fæstir kannast við í liði Bandaríkjanna, sem státar í ár af svo stórum nöfnum golfheimsins.

Scottie Scheffler. Mynd: Robb Carr

Hver er þessi Scottie Scheffler?

Scottie Scheffler fæddist 21. júní 1996 í Ridgewood, New Jersey og er því aðeins 25 ára. Hann veit það líklegast ekki, en Scottie á sama afmælisdag og íslenska golfdrottningin Ragnhildur Sigurðardóttir, GR og aðrir frábærir kylfingar m.a. Matt Kuchar, William McGirt, Sang Moon-Bae og Carly Booth og því virðist 21. júní vera afmælisdagur mikilla kylfinga!

Foreldrar hans eru Scott og Diane Scheffler og Scottie á 3 systur: Söru, Molly og Callie Scheffler.

Scottie var í Highland Park High School og síðan í bandaríska háskólagolfinu þ.e. lék golf með liði The University of Texas at Austin.

Scottie útskrifaðist frá Austin háskóla 2018 með gráðu í fjármálafræði (ens: finance) og gerðist þegar að loknu háskólanámi atvinnumaður í golfi.

Scottie brilleraði þegar í menntaskóla vann t.a.m. þrisvar sinnum í Texas State mótum, en Jordan Spieth er eini kylfingurinn, fyrir utan Scottie, sem hefir tekist það.

Scottie Scheffler spilaði í Opna bandaríska risamótinu 2017 og var með lægsta skor áhugamanns.

Scottie, eins og svo margir atvinnukylfingar í Bandaríkjunum styður góð málefni og styrktarmálefni hans eru krabbameinssjúk börn „Triumph Over Kid Cancer.“ Frábært að hafa svona góðan kylfing styðja svona verðugt verkefni!!!

Scottie Scheffler komst á Korn Ferry Tour 2019 og á nýliðaári sínu sigraði hann þegar í 2 mótum á mótaröðinni: Evans Scholars Invitational og Nationwide Children’s Hospital Championship og það er ástæðan fyrir að hann er kominn á bestu karlmótaröð í heimi aðeins 23 ára!!!

Í janúar 2020 komst Scheffler í fréttirnar fyrir „næstum því örn“ á The American Express mótinu – Rifja má það upp með því að SMELLA HÉR: 

Í ágúst sama ár (2020) var Scheffler aftur í fréttunum þegar hann spilaði á 59 glæsihöggum á 2. hring Northern Trust mótsins, en hringurinn var sögulegur því einungis 12 kylfingum hafði til þess tíma tekist að spila undir 60 í PGA Tour móti.

Scheffler hefir aldrei tekist að sigra í PGA Tour móti og besti árangur hans til þessa í risamóti er T-4 árangur á PGA Championship, árið 2020.

En Scheffler á framtíðina fyrir sér og vonandi stendur hann undir væntingum á 1.  Ryder Cup móti sínu!