2-hanska Gainey handtekinn f. að falast eftir vændiskonu

Fyrrum sigurvegari á PGA Tour, tveggja hanska Tommy Gainey var handtekinn 8. desember sl. fyrir að falast eftir þjónustu vændiskonu.

Sjá má eldri kynningu Golf 1 á Gainey með því að SMELLA HÉR: 

Hann lenti á lögreglukonu, sem þóttist vera vændiskona og allt var tekið upp þegar hann var að semja við hana um endurgjald fyrir þjónustu hennar upp á $60.  Upptakan lenti síðan í höndum TMZ sjónvarpsstöðvarinnar og var sjónvörpuð um öll Bandaríkin. Sérlega bagalegt fyrir Gainey, sem er kvæntur maður og á börn, 11 og 5 ára og býr í frekar litlum bæ Hartsville, í S-Karólínu.

Upptakan var hluti af aðgerðaráætlun lögreglunnar í Polk County í Flórída, sem gekk undir nafninu “Operation Santa’s Naughty List.”

Aðgerðir lögreglunnar stóðu í 6 daga og fólust í því að nota lögreglukonur til þess að þykjast vera vændiskonur, en það leiddi það til handtöku 124 karlmanna, sem voru að falast eftir þjónustu vændiskvennanna (ens. solicitation) sem er brot skv. hegningarlögum.

Gainey, sem sigraði á  McGladrey Classic 2012 sagði lögreglu að hann væri um vikutíma í Polk county á góðgerðargolfmóti. Lögreglan svaraði á fréttamannafundi um handtöku Gainey að hann myndi missa af næsta rástíma sínum.

Gainey var sleppt eftir að hafa greitt $500 í tryggingu. Þetta er í fyrsta sinn, sem hann gerist brotlegur við refsilög.

Þess mætti geta að á félagsmiðlum virðast menn fremur hafa samúð með Gainey og segja að lögreglan ætti frekar að vera að beina kröftum sínum að verulegum illvirkjum; t.a.m. höfuðpaurum mansals- og vændishringja, heldur en að vera eltast við staka karlræfla í leit að stundargamni.