Tiger valdi Fowler í stað Koepka

Brooks Koepka hefir verið að fást við meiðsli í hné, sem urðu þess valdandi að hann getur ekki spilað í Forsetabikarnum, en hann var með sjálfkrafa sæti í liðinu, þar sem hann er nr. 1 á heimslistanum.

Í fréttatilkynningu frá honum sagði m.a.: „Ég tilkynni hér með að ég dreg mig úr Forsetabikarnum vegna hnémeiðsla. Ég hef látið fyrirliðann Tiger Woods vita að þrátt fyrir linnulausar læknismeðferðir og endurhæfingu þá mun ég ekki verða fær að spila golf á þessum tíma. Ég álít það mikinn heiður að vera hluti af 2019 (Forsetabikars-) liðinu og þykir leitt að geta ekki keppt. Frá því að meiðslin tóku sig upp í Kóreu hef ég verið stöðugt í sambandi við Tiger og ég hef fullvissað hann um að ég hef reynt 100% að vera til fyrir Forsetabikarinn í Ástralíu. Hvað sem því líður, þarfnast ég meiri tíma til þess að ná mér aftur. Mér þykir leitt að vera ekki fulltrúi rauðs, hvíta og bláa liðsins í þetta sinn og óska liðsfélögum mínum alls hins besta til þess að koma aftur með Forsetabikarinn til Bandaríkjanna.„
Þessi tilkynning Brooks Koepka birtist á @bkoepka) í fyrradag 20. nóvember kl. 8:00.

Tiger var snar í snúningum og valdi vin sinn Rickie Fowler í liðið í stað Koepka, en Rickie hefir tvívegis áður spilað í Forsetabikarnum.

Tiger hafði m.a. eftirfarandi að segja um leikmannaskiptin:

„Brooks (Koepka) og ég töluðum og hann er vonsvikinn að geta ekki keppt,“ sagði Tiger. „Ég óskaði honum góðs bata og að við værum leiðir að hann gæti ekki verið með okkur í Ástralíu. Hann er mikill styrkur bæði á velli og í liðsherberginu. Ég talaði við Rickie (Fowler) og hann samþykkti að vera í bandaríska liðinu. Rickie hefir spilað í tveimur Forsetabikurum og var einn af þeim sem sterklega komu til greina í vali mínu sem fyrirliða og hann er virtur og liðsfélögum hans líkar vel við hann. Ég veit að hann mun standa sig frábærlega fyrir okkur. Við erum allir spenntir fyrir keppninni í ár. Völlurinn er framúrskarandi og áhangendurnir munu verða háværir og við spilum gegn góðum keppnismönnum. Við erum tilbúnir í slaginn!„

Fowler kemur nú aftur eftir nokkuð langa fjarveru, sem lengdist óvænt enn meir vegna bakterísýkingar sem hann fékk á hveitbrauðsdögum sínum, en hann kvæntist s.l. sumar.

Meðal þess sem Fowler sagði var eftirfarandi: „Þegar ég heyrði að Brooks gæti ekki spilað varð ég leiður hans vegna og vegna liðsins. Síðan fékk ég símhringingu bæði frá Brooks og Tiger. Ég er auðmjúkur og spenntur að fá tækifæri til að spila. Þessar liðakeppnir hafa verið einhverjar minnisstæðustu vikur ferils míns. Að vera valinn af Tiger til að keppa með honum og liðinu er mjög sérstakt. Það er ómögulegt að koma í stað nr. 1 á heimslistanum en ég vil fullvissa liðsfélaga mína og bandaríska áhangendur að  ég mun vera undirbúinn og tilbúinn til þess að leggja mitt á vogarskálarnar til þess að koma heim (til Bandaríkjanna) með Forsetabikarinn.“

Árangur Rickie Fowler er 4-3-1 í Forsetabikarnum og var sérlega glæsileg frammistaða hans á Liberty National fyrir 2 árum 3-0-1.

Forsetabikarinn fer fram 12.-15. desember í næsta mánuði í Royal Melbourne golfklúbbnum í Ástralíu.