Nýju strákarnir á PGA 2020: Grayson Murray (40/50)

Eins og á undanförnum árum mun Golf 1 kynna „Nýju strákana“ á PGA Tour. Nú verða kynntir „nýju strákarnir“ keppnistímabilið 2019-2020 til sögunnar, en það eru sem fyrr efstu 25 á peningalista Korn Ferry Tour eftir 2018-2019 keppnistímabilið og síðan þeir 25 sem stóðu sig best í síðustu 3 mótunum á mótaröðinni þ.e. í Korn Ferry Tour Finals.

Nú hafa verið kynntir þeir 25, sem urðu efstir á stigalista Korn Ferry Tour eftir reglulega tímabilið og hlutu þannig kortin sín á mótaröð þeirra bestu, PGA Tour. Nú er aðeins eftir að kynna þá 25, sem urðu efstir á Korn Ferry Tour Finals og fengu kortin sín þannig.

Í dag verður kynntur sá sem varð í 11. sæti á Korn Ferry Tour Finals en það er Grayson Murray, sem var með 333 stig.

Grayson Murray fæddist 1. október 1993 í Raleigh, N-Karólínu og er því nýorðinn 26 ára.

Murray hóf ungur að keppa í mótum og sigra sbr. eftirfarandi sigra hans á Callaway unglingamótaröðinni:

2006 Callaway Junior World Golf Championship (Strákar 11–12 ára)
2007 Callaway Junior World Golf Championship (Strákar 13–14 ára)
2008 Callaway Junior World Golf Championship (Strákar 13–14 ára)

Á háskólaárum sínum skipti hann oft um skóla þ.e. var í eftirfarandi háskólum og keppti með skólaliðunum í golfi: Wake Forest University, East Carolina University og Arizona State University.

Árið 2013 spilaði Murray í fyrsta sinn í risamóti þ.e. Opna bandaríska en komst ekki í gegnum niðurskurð. Besti árangur hans í risamóti er T-22 á PGA Championship, 2017.

Murray sigraði á undanfara Korn Ferry Tour þ.e. Nationawide Tour 2016 á Nationwide Children’s Hospital Championship.

Þótt Murray sé tiltölulega ungur að árum og ekki sá þekktasti á PGA Tour hefir hann þó þegar sigrað á 1 móti á PGA Tour þ.e. Barbasol Championship, 2017 og má sjá frétt Golf 1 um það með því að SMELLA HÉR: 

Annað um Murray:

* Hann myndi vilja vera golfvallaarkítekt ef hann væri ekki atvinnumaður í golfi.
* Fyrsta golfminningin er þegar hann hitti „kónginn“ Arnold Palmer þegar hann var 9 ára.
* Myndi vilja skipta um hlutverk við Will Ferrell í einn dag svo að hann gæti fengið alla til að hlægja.
* Hann styður „The First Tee of the Triangle“, sem veitir krökkum í heimabæ hans tækifæri á að kynnast golfi.

Í aðalmyndaglugga: Grayson Murray þegar hann sigraði á Barbasol PGA Tour mótinu 2017.