Nýju strákarnir á PGA 2020: Joseph Bramlett (29/50)

Eins og á undanförnum árum mun Golf 1 kynna „Nýju strákana“ á PGA Tour. Nú verða kynntir „nýju strákarnir“ keppnistímabilið 2019-2020 til sögunnar, en það eru sem fyrr efstu 25 á peningalista Korn Ferry Tour eftir 2018-2019 keppnistímabilið og síðan þeir 25 sem stóðu sig best í síðustu 3 mótunum á mótaröðinni þ.e. í Korn Ferry Tour Finals.

Nú hafa verið kynntir þeir 25, sem urðu efstir á stigalista Korn Ferry Tour eftir reglulega tímabilið og hlutu þannig kortin sín á mótaröð þeirra bestu, PGA Tour. Nú er aðeins eftir að kynna þá 25, sem urðu efstir á Korn Ferry Tour Finals og fengu kortin sín þannig.

Í dag verður kynntur sá sem varð í 22. sæti Korn Ferry Tour Finals en það er Joseph Bramlett sem var með 189 stig.

Joseph Bramlett er ekki „nýr strákur“ á PGA Tour í þrengsta skilningi þeirra orða. Hann snýr nú aftur á mótaröðina eftir langvinn meiðsli.

Joseph Eugene Bramlett er fæddur 7. apríl 1988 og er því 31 árs. Hann er sonur Marlo og Debbie og á eina systur Jessicu og einn bróður Jordan.

Joseph Bramlett er 1,88 m á hæð og 82 kg.

Hann var í St. Francis High School í Mountain View, Kalíforníu.

Bramlett lék á háskólaárum sínum með golfliði Stanford háskóla í Kaliforníu, líkt og átrúnaðargoð hans, Tiger.

Hann hlaut fyrsta kortið sitt á PGA Tour eftir úrtökumót 2010 og var ásamt Tiger eini bandaríski kylfingurinn af afrískum uppruna á PGA Tour mótaröðinni 2011.

Hins vegar náði hann ekki að vera meðal efstu 25 til að endurnýja kortið sitt fyrir 2012 keppnistímabilið og hefir því spilað mestmegnis á undanfara Korn Ferry Tour.

Hann fékk hastarlega í bakið, 2013 og hefir átt við bakmeiðsli að glíma undanfarin ár.

Bramlett hefir sagt að í draumaholli sínu væri auk hans sjálfs, pabbi hans, Tiger og Barack Obama.

Uppáhaldslið Bramlett eru: Golden State Warriors, San Francisco 49ers og öll lið Stanford University.

Meðal áhugamála Bramlett utan golfsins eru körfubolti og tónlist.

Í aðalmyndaglugga: Tiger og Joseph Bramlett