Hver er kylfingurinn: JT Poston?

JT Poston sigraði á Wyndham Championship.

Hann er ekki sá þekktasti á PGA Tour þannig að sumir kunna að spyrja: Hver er kylfingurinn?

JT Poston heitir fullu nafni James Tyree Poston.

Hann fæddist 1. júní 1993 í Hickory, Norður-Karólínu og er því 26 ára.

Hann er fremur hávaxinn 1,85 m á hæð og 75 kg.

Hann spilaði golf þegar í menntaskóla með og átti m.a. mótsmet í NCHSAA golfmóti, 63 högg

Poston spilaði síðan í bandaríska háskólagolfinu með golfliði Western Carolina University.

Sem áhugamaður sigraði Poston m.a. í eftirfarandi mótum:

2011 Trusted Choice Big I National Championship
2013 Southwestern Amateur, Golfweek Program Challenge, Cardinal Intercollegiate, Hummingbird Intercollegiate
2014 SoCon Championship
2015 Wexford Plantation Intercollegiate, SoCon Championship

Poston gerðist atvinnumaður í golfi í lok árs 2015.

Hann var með engan status á neinni mótaröð í ársbyrjun 2016, en komst í gegnum úrtökumót fyrir United Leasing Championship í 2. deild karlagolfsins, Web.com Tour og lauk keppni T23. Með þessum flotta árangri hlaut hann þátttökurétt á Rex Hospital Open þar sem hann varð T-3 og þar með var hann kominn með takmarkaðan þátttökurétt á Web.com Tour út tímabilið. Hann átti fimm topp-15 árangra þ.á.m. landaði hann 2. sætinu tvívegis í mótum, sem varð til þess að Poston varð í 10. sæti á peningalista mótaraðarinnar og ávann sér þannig sæti á PGA Tour fyrir 2017 keppnistímabið, þar sem hann hefir haldið sér síðan.

Þann 4. ágúst 2019 (í gær) sigraði Poston síðan í fyrsta sinn á PGA Tour móti þ.e. Wyndham Championship eftir glæsilokahring upp á 8 undir pari og með því að skila skollalausum kortum allt mótið. Hann er fyrsti kylfingurinn frá 1974 til þess að sigra á PGA Tour móti án eins einasta skolla!!!

Sigurskorið í mótinu var 22 undir pari, 258 högg (65-65-66-62) og átti hann 1 högg á þann sem næstur kom, Webb Simpson. Þess mætti geta að þeir báðir Poston og Simpson eru frá N-Karólínu, og því öllum hnútum kunnugir í Sedgefield CC þar sem Wyndham Championship fer fram – Simpson var m.a. í sama háskóla og Ólafía Þórunn „okkar“ Kristinsdóttir, Wake Forest í Winston-Salem, N-Karólínu.

Besti árangur Poston í risamóti til þessa er á PGA Championship á þessu ári (2019), þar sem hann komst gegnum niðurskurð og lauk keppni T-60.