Nýju stúlkurnar á LET 2018: Vikki Laing (13/25)

Golf 1 mun nú kynna þær stúlkur sem hlutu fullan keppnisrétt á Evrópumótaröð kvenna, en lokaúrtökumótið fór fram í Marokkó í 16.-20. desember 2017.

Leiknir voru 5 hringir og voru stúlkurnar 60 að þessu sinni sem kepptu um kortið sitt, þ.á.m. Guðrún Brá Björgvinsdóttir, GK.

Það voru 25 efstu stúlkurnar sem komust á LET og baráttan í ár var hörð.

T.a.m. voru 6 stúlkur jafnar í 24. sætinu á samtals 4 undir pari, 356 höggum og varð að koma til bráðabana milli þeirra því aðeins tvö sæti voru í boði þ.e. það 24. og 25.

Það voru tvær norskar stúlkur sem sigruðu í bráðabananum þ.e. þær Celine Borge og Madeleine Stavnar (báðar með örn á par-5 18. holuna þar sem úrslitin réðust).

Þær 4, sem sátu eftir með sárt ennið voru hin spænska Maria Palacios Siegenthaler; Julie Aime frá Frakklandi; Kiran Matharu frá Englandi og Tiia Koivisto frá Finnlandi.

Þessar tvær heppnu stúlkur, sem unnu í bráðabanaum um 24. og 25. sætin hafa nú verið kynntar og eins stúlkurnar 5 sem urðu í 19.sæti en það eru Ariane Provot frá Frakklandi; Katja Pogacar frá Slóveníu; Ainil Bakar frá Bandaríkjunum; Sideri Vanova frá Tékklandi og Lucrezia Colombotto Rosso frá Ítalíu. Eins hafa þrjár stúlkur sem urðu í 16. sæti á samtals 6 undir pari, 354 höggum verið kynntar: Elia Folch frá Spáni; Cloe Frankish frá Englandi og Sanna Nuutinen frá Finnandi. Næst voru þær sem deildu 14. sætinu kynntar: Mireia Prat og Piti Martinez Bernal, en báðar léku þær á samtals 7 undir pari, 353 höggum.

Nú verður byrjað á að kynna þær 5 stúlkur sem deildu 9. sætinu, en það eru: Julía Engström og Cajsa Persson frá Svíþjóð; Vikki Laing frá Skotlandi; Laura Sedda frá Ítalíu og Elína Nummenpaa frá Finnlandi. Þær léku allar á samtals 8 undir pari, 352 höggum.

Vikki Laing fæddist 14. mars 1981 í Edinborg, Skotlandi og er því 36 ára.

Eftirfarandi eru hápunktar á áhugamannsferli Laing:

Fjórfaldur skoskur meistari unglinga (1996-1999). Þrefaldur meistari Wales í höggleik (2001, 2002, 2003) Var í liði Breta&Íra í Curtis Cup árið 2002. Sigurvegari í Pac-10 Championship árið 2003 þ.e. einstaklingskeppninni meðan hún var enn í University of California-Berkeley.Varð í 2. sæti í einstaklingskeppninni í NCAA Regional Championship, árið 2003.

Laing var í bandaríska háskólagolfinu, þar sem hún spilaði með kvennagolfliði University of California-Berkeley og útskrifaðist sem félagsfræðingur þaðan 2003.  Strax að loknu háskólanámi gerðist Laing atvinnumaður í golfi.

Laing spilaði síðan á Duramed-Futures Tour 2006-2009 og hefir verið á LET meira og minna í 9 ár, þ.e. frá árinu 2009. Besti árangur er 2. sætið á Sanya Ladies Open í Yalong Bay Golf Club í Hainan, Kína.

Áhugamál Laing: Ræktin, lestur góðra bóka, íþróttir almennt og að borða góðan mat.