Nýju stúlkurnar á LPGA 2018: Jessy Tang (34/49)

Það voru 49 stúlkur sem hlutu spilarétt á LPGA mótaröðina 2018 í gegnum lokaúrtökumót LPGA sem fram fór á LPGA International vellinum í Flórída dagana 28. nóvember – 3. desember s.l.

Það voru 29 sem hlutu takmarkaðan spilarétt og 20 efstu stúlkurnar sem hlutu kortið sitt á LPGA þ.e. fullan þátttökurétt í öllum mótum LPGA 2018.

Venja hefir verið undanfarin ár að kynna „nýju“ stúlkurnar á LPGA og líkt og áður verður byrjað að kynna þær sem rétt sluppu inn á mótaröðina og hlutu takmarkaðan spilarétt endað á þeirri sem sigraði í lokaúrtökumótinu, en það var japanska stúlkan Nasa Hataoka.

Nú verður tekið til við að kynna þær 20 stúlkur sem hlutu fullan spilarétt og kortið sitt á LPGA. Búið er að kynna Maríu Torres, sem varð svo sannarlega að berjast fyrir veru sinni á LPGA og hafði betur í bráðabana gegn tveimur öðrum og var ein í 20. sæti.

Búið er að kynna 3 af þeim 4 sem deildu 16. sætinu: Briönnu Do, Celine Herbin og Dani Holmqvist og í dag er það lokastúlkan af fjórmenningunum í 16. sæti:  Jessy Tang.

Jessy Tang fæddist í Miami, Flórída 21. nóvember 1988 og er því 29 ára. Hún ólst hins vegar upp í Bankok, Thaílandi og talar 3 tungumál: ensku, tælensku og mandarín reiprennandi.

Jessy byrjaði að spila golf 10 ára.

Meðal áhugamála Tang eru lestur, allar íþróttir og listir.

Tang var nýliði á LPGA líkt og Ólafía Þórunn „okkar“ Kristinsdóttir 2017. Hins vegar var Tang bara með takmörkuð spilaréttindi því hún lauk keppni T-35 í lokaúrtökumóti LPGA 2016 og spilaði því aðeins í 8 mótum 2017.

Tang hefir aðallega keppt í 2. deildinni, Symetra Tour, frá árinu 2009, en hún gerðist atvinnumaður í golfi 2010.

Þegar Tang náði kortinu sínu  á LPGA og langþráðum fullum spilaréttindum á LPGA fyrir 2018 keppnistímabilið sagði hún:

„Ég er fullkomlega ánægð. Eftir að hafa spilað á LPGA sl. keppnistímabil með takmörkuð spilaréttindi vissi ég að markmið mitt yrði alltaf að vera hér úti með fullan spilarétt og ég var svo ánægð að mér tókst það […].„