Ólafía bætti enn eitt metið á heimslistanum – Valdís upp um 241 sæti á einu ári

Ólafía Þórunn Kristinsdóttir úr GR og Valdís Þóra Jónsdóttir úr Leyni halda áfram að klifra upp heimslistann í golfi sem er uppfærður vikulega. Ólafía Þórunn er í sæti nr. 179 sem er besti árangur sem Íslendingur hefur náð á heimslista atvinnukylfinga. Áður hafði Ólafía Þórunn náð sæti nr. 181 en hún fer upp um fimm sæti frá því í síðustu viku. Á s.l. 12 mánuðum hefur Ólafía Þórunn farið úr sæti nr. 611 í sæti nr. 179 eða upp um 423 sæti.

Valdís Þóra tók risastökk í lok október á þessum lista en hún heldur áfram að bæta stöðu sína. Valdís Þóra er í sæti nr. 516 og hefur hún aldrei verið hærra á listanum áður. Hún fer upp um 1ö sæti á milli vikna. Á s.l. 12 mánuðum hefur Valdís Þóra farið úr sæti nr. 752 í sæti nr. 516 eða upp um 241 sæti.

Staðan á heimslistanum er gríðarlega mikilvæg fyrir stöðu keppenda fyrir Ólympíuleikana 2020 í Tokýó í Japan.

Alls komast 60 kylfingar inn á Ólympíuleikana hjá báðum kynjum eða 120 keppendur samtals. Viðamikið kvótakerfi er í gangi varðandi þátttökurétt keppenda og er það gert til þess að sem flestar þjóðir eigi möguleika á að koma keppendum inn á ÓL.

Fimmtán efstu á heimslista karla og kvenna komast sjálfkrafa inn á ÓL 2020 en aðeins fjórir geta verið frá sama landi á þeim lista. Kvóti er á fjölda keppenda frá hverri þjóð og geta aðeins tveir að hámarki verið frá sama landi í sætum 16-59 á styrkleikalistanum.

Sem dæmi má nefna að á ÓL í Ríó de Janiero í Brasilíu árið 2016 komst Cathryn Bristow frá Nýja-Sjálandi inn á ÓL. Hún var í sæti nr. 446 þegar heimslistinn var uppfærður þann 11. júlí 2016 en það var síðasti möguleiki keppenda til þess að bæta stöðu sína á heimslistanum.

Á þeim tíma voru Ólafía Þórunn og Valdís Þóra Jónsdóttir í sætum nr. 714 og 731 á heimslistanum. Ólafía var því 268 sætum frá því að komast inn og Valdís Þóra var 285 sætum frá því að komast inn á ÓL.

Miðað við stöðuna hjá Ólafíu Þórunni núna þá væri hún í hópi þeirra sem kæmust inn á ÓL 2020.

Texti: GSÍ