Nýju strákarnir á PGA 2018: Beau Hossler (1/50)

Það voru 25 efstu á peningalista Web.com Tour sem hlutu kortin sín og þar með fullan spilarétt á PGA Tour, keppnistímabilið 2017-2018.

Golf 1 hefir haft þann vana á undanförnum árum að kynna alla þessa 50 nýju og ekki svo nýju, sem hins vegar hljóta spilarétt sinn að nýju á PGA Tour í gegnum 2. deildina, Web.com Tour.

Byrjað verður á því að kynna þá 25 sem efstir voru á peningalista Web.com Tour og hljóta þannig kortið sitt í 1. deild, PGA Tour.

Líkt og venja er hér á Golf 1 verður byrjað að kynna þann, sem rétt slapp inn í gegnum peningalistann og síðan endað á þeim sem var á toppnum. Síðan verður tekið til við að kynna þann sem rétt slapp inn í gegnum Web.com Finals og endað á þeim sem var á toppnum þar.

Sá sem rétt slapp inn í gegnum peningalistann í ár er bandaríski kylfingurinn og lukkunar pamfíllinn Beau Hossler.

Beau Hossler fæddist 16. mars 1995 í Mission Viejo, Kaliforníu og því 22 ára.

Hann er reyndar frá Rancho Santa Margarita í Kaliforníu, þar sem hann býr.  Hossler er 1,85 m á hæð og 88 kg.

Hossler vakti fyrst athygli á sér 2012, þegar hann 17 ára gamall tók þátt í Opna bandaríska í 2. skipti og varð T-29, sem enn er besti árangur hans í risamóti. Hossler ávann sér einnig rétt til þátttöku í Opna bandaríska 2015 og þá varð hann T-58.

Hossler útskrifaðist frá  Santa Margarita Catholic menntaskólanum. Árið 2013, hóf hann nám við University of Texas á golfskólastyrk.

Á þeim 3 árum, sem hann var í Texas háskóla vann hann 6 einstaklingstitla í bandaríska háskólagolfinu og 2016 vann hann Fred Haskins Award, sem besti kylfingur í bandaríska háskólagolfinu það ár.

Hann gerðist atvinnumaður 2016, þegar hann átti bara eftir 1 ár í bandaríska háskólagolfinu.

Helstu sigrar Hossler sem áhugamanns í golfi eru eftirfarandi:
2010 Trader Joe’s Junior Championship, Stockton Sports Commission Junior
2011 Callaway Junior World Golf Championships (boys 15–17)
2012 Winn Grips Heather Farr Classic
2013 Southern California Amateur
2014 Southern California Amateur, Western Amateur
2015 John Hayt Collegiate Invitational, Nike Collegiate Invite
2016 Arizona Intercollegiate, Jones Cup Invitational, John Burns Intercollegiate, Lamkin Grips SD Classic, 3M Augusta Invitational