Úrtökumót Evrópumótaraðarinnar: Aron Snær og Þórður hefja leik í dag – Fylgist með HÉR!!!

Tveir íslenskir kylfingar hefja leik í dag á úrtökumótinu fyrir Evrópumótaröðina í karlaflokki í dag. Aron Snær Júlíusson úr GKG keppir á Fleesense vellinum í Þýskalandi og fylgjast má með gengi hans með því að                  SMELLA HÉR: 

Þórður Rafn Gissurarson úr GR keppir á The Roxburghe vellinum í Skotlandi  og má fylgjast með gengi hans með því að SMELLA HÉR: 

Þetta er í fyrsta sinn sem hinn tvítugi Aron Snær leikur á úrtökumótinu en hann hefur leikið vel á undanförnum vikum hér á Íslandi og fagnað sigri á tveimur mótum í röð á Eimskipsmótaröðinni.

Þórður Rafn, sem varð þrítugur nýverið, er að taka þátt í áttunda sinn á úrtökumótinu. Hann hefur leikið á Pro Golf atvinnumótaröðinni undanfarin ár og er í 19. sæti peningalistans þessa stundina. Þórður Rafn varð Íslandsmeistari í golfi árið 2015 og hefur hann tvívegis komist í gegnum 1. stig úrtökumótsins, og það gerði hann árið 2015 og 2016.

Um 700 keppendur taka þátt á 1. stigi úrtökumótsins en keppt er á 8 völlum í haust og komast um 25% af keppendum á hverju velli fyrir sig áfram á 2. stigið.

Það má gera ráð fyrir að alls verði átta íslenskir karlar sem reyni fyrir sér á úrtökumótinu fyrir Evrópumótaröðina i haust. Ólafur Björn Loftsson (GKG), Guðmundur Ágúst Kristjánsson (GR), og Andri Þór Björnsson (GR) hefja leik á 1. stiginu síðar í haust. Axel Bóasson (GK) og Haraldur Franklín Magnús (GR) eru í harðri baráttu um að komast í hóp 5 efstu á stigalista Nordic Tour atvinnumótaraðarinnar sem tryggir sæti á Áskorendamótaröðinni á næsta tímabili. Þeir verða báðir á meðal keppenda á úrtökumótinu en það er ekki vitað hvort þeir fari beint inn á 2. stigið.

Birgir Leifur Hafþórsson úr GKG er í góðri stöðu að tryggja sér keppnisrétt á Evrópumótaröðina. Hann er í 16. sæti peningalistans á Áskorendamótaröðinni en 15 efstu sætin tryggja keppnisrétt á Evrópumótaröðina. Ef það tekst ekki fer Birgir Leifur beint inn á 2. eða lokastig Evrópumótaraðarinnar.

Texti: GSÍ