LET: Valdís Þóra gæti tryggt sér sæti á Opna breska í dag

Valdís Þóra Jónsdóttir úr Golfklúbbnum Leyni á Akranesi hefur leik í dag á úrtökumóti fyrir Opna breska meistaramótið sem hefst á fimmtudaginn á Kingsbarns vellinum í Skotlandi. Mótið sem Valdís keppir á fer fram á Castle Course í St. Andrews í Skotlandi. Hún á rástíma kl. 11.00 í dag og er aðeins leikinn einn 18 holu hringur.

Alls eru 112 keppendur á þessu lokaúrtökumóti og komast 20 efstu inn á risamótið sem hefst á fimmtudaginn eins og áður segir. Valdís Þóra hefur leikið á einu risamóti á ferlinum en það var á Opna bandaríska meistaramótinu 13.-16. júlí s.l. Sjá má keppendalistann með því að SMELLA HÉR: 

ALLS ERU 112 KEPPENDUR Á ÞESSU LOKAÚRTÖKUMÓTI OG KOMAST 20 EFSTU INN Á OPNA BRESKA.

Valdís Þóra komst inná þetta lokaúrtökumót vegna góðrar stöðu hennar á peningalista LET Evrópumótaraðarinnar þar sem hún er með keppnisrétt.
Eins og kunnugt er hefur Ólafía Þórunn Kristinsdóttir úr GR nú þegar tryggt sér keppnisrétt á Opna breska meistaramótinu. Hún endaði í 13.-19. sæti á Opna skoska meistaramótinu sem lauk í gær og þar voru þrjú sæti á Opna breska í boði fyrir þá kylfinga sem höfðu ekki tryggt sér keppnisrétt á risamótinu. Allir kylfingarnir sem voru fyrir ofan Ólafíu á mótinu í Skotlandi höfðu tryggt sér keppnisrétt á Opna breska og þar af leiðandi fékk hún eitt af þessum þremur sætum sem voru í boði á því móti. Ef Valdís Þóra nær einu af 20 efstu sætunum í dag á lokaúrtökumótinu verða tveir íslenskir kylfingar á meðal keppenda á risamótinu Opna breska sem er eitt af fimm risamótum ársins á LPGA/LET atvinnumótaröðum kvenna.

Texti: GSÍ