Hver er kylfingurinn: Harukyo Nomura?

Japanski kylfingurinn Haru Nomura, sem reyndar heitir fullu nafni Harukyo Nomura  (á japönsku: 野村敏京; á kóreönsku: 문민경); sigraði í gær á Volunteers of America Texas Shootout, þar sem Ólafía Þórunn „okkar“ Kristinsdóttir komst ekki í gegnum 2. niðurskurð eftir 3. hring.

Nomura er e.t.v. ekki þekktasti kylfingur LPGA og því ekki að undra að sumir spyrji: Hver er kylfingurinn?

Haru Nomura

Haru Nomura fæddist 25. nóvember 1992 í Yokohama í Japan og er því 24 ára.

Nomura á kóreanska móður og japanskan föður og fluttist til S-Kóreu þegar hún var 5 ára og bjó í Seúl höfuðborg S-Kóreu þar til hún útskrifaðist frá Myongji menntaskólanum. Árið 2011 valdi hún japanskt þjóðerni og keppir því f.h. Japan, en býr í Honolulu á Hawaii.

Nomura byrjaði að spila golf 11 ára. Árið 2007 varð sigraði hún á  the Japan Junior Golf Championship fyrir stelpur 12–14 ára.

Árið 2009 var hún sá áhugamaður sem var með lægsta skorið á Japan Women’s Open.

Nomura gerðist atvinnumaður í desember 2010 eftir að henni hafði tekist að komast á LPGA í fyrstu tilraun sinni. Hún varð T-39 í lokaúrtökumótinu og hlaut kortið sitt á LPGA fyrir 2011 keppnistímabilið.

Árið 2011 tók Nomura þátt í U.S. Women’s Open, eftir að hafa komist í gegnum úrtökumót.

Fyrsti sigur hennar sem atvinnumanns var á LPGA Futures Tour í apríl 2011 en þar vann hún sigur á Daytona Beach Invitational.

Næst sigraði hún í maí 2011 á PGA of Japan Tour og þriðji sigur hennar var á LPGA of Korea Tour árið 2015.

Árið 2013 varð hún í 2. sæti á Mizuno Classic á LPGA.

Haru Nomura eftir sigurinn á ISPS Handa 2016

Þann 21. febrúar 2016 (í fyrra) hafði Nomura betur gegn nr. 1 á Rolex-heimslistanum, Lydiu Ko, og vann fyrsta LPGA mót sitt: ISPS Handa Women’s Australian Open, en þetta var fyrsti sigur japansks kylfings á LPGA frá því Mika Miyazato sigraði á the Safeway Classic árið 2012.

Með þessum sigri fór Nomura úr 67. sætinu á Rolex heimslistanum í 50. sætið og var í 2. sæti á peningalista LPGA 2016.

Nú í gær, 30. apríl 2017, bætti hún enn einni rósinni í hnappagatið: sigur á Volunteers of America Texas Shootout.

Nomura hefir því sigrað 3 sinnum á LPGA; 1 sinni á Evrópumótaröð kvenna; 1 sinni á japanska LPGA; 1 sinni á kóreanska LPGA; 1 sinni á ALPG og 1 sinni á Symetra Tour.

Besti árangur Nomura í risamóti er T-8 árangur á Evian Masters 2016.