PGA: Horrorhringur Alker

Steven Alker frá Nýja-Sjálandi er í neðsta sæti (76. sæti) þeirra sem náðu niðurskurði á Texas Valero Open.

Hann er búinn að spila hringina 3 á mótinu á samtals 12 yfir pari, 228 höggum (67 76 85).

Alker byrjaði mótið reyndar vel – lék á 5 undir pari, 67 höggum og var T-2 þ.e. deildi 2. sætinu með öðrum kylfingum.

Því er fall hans svo eftirtektarvert. Annar hringurinn var alger júmbóhringur 4 yfir pari 76 högg, en það var ekkert miðað við það hvað átti eftir að gerast á 3. hring.

Þriðja hring lék Alker á 13 yfir pari, heilum 85 höggum og líktist meira meðalskussa á góðum degi en PGA Tour kylfingi.

Alker byrjaði horrorhringinn á 10. holu.  Hann fékk skolla á 12., 15. og 18. en tókst reyndar að taka þetta aðeins aftur með fugli á 17. holu.

Hann var því á 2 yfir pari eftir fyrri 9 holurnar sínar á 3. hring og það var á seinni 9 (fyrri 9 á vellinum í San Antonio) sem allt fór úrskeiðis.

Það byrjaði þegar á par-4 1. holunni. Alker átti teighögg út í runnaröff og þurfti að nota 2 högg til að koma boltanum aftur í leik og lokaskorið á holunni var þrefaldur skolli.

En hann fór úr öskunni í eldinn á par-3 3. holunni fyrir Alker.  Teighögg hans þar lenti þrisvar sinnum í vatnshindrun og það ásamt lélegum púttum eftir að boltanum var loks komið á flöt olli júmbóskorinu 9 höggum!!!

Alker fékk enn annan skolla á 4. holu áður en honum tókst að ná jafnvægi og setja niður nokkur pör áður en hann lauk horrorhring sínum með skolla á 9. braut.

Alker er langneðstur á samtals 12 yfir pari – næsti keppandi fyrir ofan hann er Kanadamaðurinn Adam Hadwin, sem líka gengur ekkert allt of vel í mótinu en er þó „aðeins“ samtals 8 yfir pari eða 4 höggum betri en Alker.

Svona getur sem sagt líka komið fyrir þá allra bestu, að þeir komist úr jafnvægi og takti á golfvellinum og eigi slæma hringi!

Skoða má horrorhring Alkers betur með því að skoða skortöflu Valeru Texas Open með því að SMELLA HÉR: