Nýju stúlkurnar á LPGA: Aditi Ashok (30/54)

Þann 30. nóvember – 4. desember 2016 fór fram 3. stigs mót LPGA, lokaúrtökumót um hverjar 20 myndu hljóta fullan keppnisrétt á LPGA keppnistímabilið 2016-2017 og hvaða keppendur hlytu takmarkaðan keppnisrétt þ.e. þær sem voru í sætum 21-45 og þær sem jafnar voru í 45. sætinu eða T-45.

155 þátttakendur voru að þessu sinni.

Nú hafa 28 stúlkur verið kynntar sem rétt sluppu inn á LPGA og eru með takmarkaðan keppnisrétt 2017.

Nú næst verða þær sem deildu 24. sætinu, en það voru 3 stúlkur sem allar léku á samtals 2 undir pari, 358 höggum: áhugamaðurinn Bronte Law (75 68 73 70 72); Aditi Ashok frá Indlandi (73 70 71 71 73) og hin danska Nicole Broch Larsen (69 78 66 69 76).

Nicole Broch Larsen hefir þegar verið kynnt og í kvöld er röðin komin að Aditi Ashok.

Aditi Ashok fæddist 29. mars 1998 í Bangalore á Indlandi og er því aðeins 18 ára. Hún byrjaði að spila golf 5 ára og pabbi hennar Pandit Gudlamani Ashok  er kaddýinn hennar. Hún nam við The Frank Anthony Public School í Bangalore og útskrifaðist 2016. a

Árið 2011 (aðeins 13 ára) sigraði Aditi tvívegis á Hero Professional Tour, sem er kvengolfmótaröðin á Indlandi þ.e. á Leg 1, Hero Professional Tour og Leg 3 (og í bæði skiptin auðvitað sem áhugamaður. )

Aditi hefir verið fulltrúi Indverja Espirito Santo Trophy 2012 og 2014 og eins á Ólympíuleikunum í Ríó 2016.

Árið 2016 var stórt fyrir Aditi, því auk þess að taka þátt í Ólympíuleikunum sigraði hún tvívegis í röð á LET 2016, þ.e. á Qatar Open (þar sem Ólafía Þórunn „okkar“ Kristinsdóttir var búin að vera í forystu allt mótið) og á Hero Women’s Indian Open.

Ekki kom því á óvart að hún skyldi verða 2. á stigalista LET og vera valin nýliði ársins 2016 í kjölfarið.

Aditi á mörg met. Hún varð sú yngsta og fyrsti Indverjinn til þess að sigra í Lalla Aicha Tour School þegar hún tryggði kortið sitt fyrir 2016 keppnistímabilið. Hún varð einnig yngsti keppandinn til þess að sigra á alþjóða golfmótaröð. Hún er jafnframt fyrsti og eini Indverjinn sem hefir spilað á 1) Asian Youth Games (2013), Youth Olympic Games (2014), Asian Games (2014) og Ólympíuleikunum(2016).

Nú er Aditi aðeins 18 ára komin með takmarkaðan spilarétt á sterkustu kvenmótaröð heims, bandaríska LPGA.

Glæsilegt hjá þessari ungu stúlku!!!