Ólafía fer í aðgerð ekki á morgun heldur hinn

Ólafía Þórunn Kristinsdóttir atvinnukylfingur úr GR fer í aðgerð þann 15. desember og er hún vongóð um að jafna sig fljótlega. Ólafía tryggði sér sem kunnugt er keppnisrétt á LPGA mótaröðinni í Bandaríkjunum fyrst allra íslenskra kylfinga og er fyrsta mótið á dagskrá vikuna 23.-29. janúar á Bahamas-eyjum.

„Ég er að gera þetta vegna ráðlegginga frá tannlækninum mínum, en ég er með undirbit sem þarf að laga þar sem að tennurnar á mér slitna hratt eins og staðan er á þessu núna. Á undanförnum vikum hef ég hugsað mikið um hvernig ég gæti gert þetta án þess að hafa mikil áhrif á mótin sem eru framundan. Í desember og janúar eru einu tækifærin fyrir okkur atvinnukylfingina að gera slíka hluti. Við náðum að flýta aðgerðinni og ég ætti að geta jafnað mig í tæka tíð fyrir fyrsta mótið á LPGA,“ segir Ólafía Þórunn en hún var einnig tilbúinn að fresta aðgerðinni um eitt ár.

Ég er í góðu standi, hraust og verð án efa fljót að jafna mig
„Ég set golfið í forgang og ég er ekki að taka áhættu með þessu. Ég hefði alveg getað frestað þessu um ár ef tímasetning á aðgerðinni hefði verið síðar í desember eða á nýju ári eins og fyrsta var stefnt að. Ég er bara jákvæð á að þetta gangi allt upp. Ég er í góðu standi, hraust og verð án efa fljót að jafna mig. Ég byrja að æfa mig í janúar eins og ég hafði áætlað, og mér veitir ekkert af því að hvíla mig aðeins á golfinu núna í desember,“ sagði Ólafía Þórunn Kristinsdóttir við golf.is

Heimild: GSÍ