Lokaúrtökumót LPGA: Ólafía Þórunn á glæsilegum 67 höggum og í 3. sæti e. 3. dag!!!

Ólafía Þórunn Kristinsdóttir, atvinnukylfingur úr GR, er búin að vera hreint frábær á lokaúrtökumóti sterkustu kvenmótaraðar heims, LPGA. Mótið stendur 30. nóvember – 4. desember 2016.

Hún lék 3. hringinn á 67 höggum og er sem stendur í 3. sæti af 155 sterkum kylfingum, sem þreyta lokaúrtökumótið á LPGA International á Daytona Beach, í Volusia sýslu, norðaustur af Orlandó í Flórída.

Ólafía Þórunn er samtals búin að spila á 9 undir pari, 207 höggum (74 66 67).

Á 3. hringnum í gær fékk hún 6 fugla, 11 pör og 1 skolla.

Aðeins tveir kylfingar eru á betra skori; þær Nasa Hataoka frá Japan, sem er efst á samtals 14 undir pari, 202 höggum (68 65 69) og Jaye Marie Green frá Bandaríkjunum, sem er á 13 undir pari, 203 höggum (68 68 67). Sjá má kynningu Golf 1 á Jaye Marie, sem sigraði í lokaúrtökumóti LPGA 2013 með því að SMELLA HÉR: 

Það eru varla til orð til að lýsa því hversu ótrúlegur árangur þetta er hjá Ólafíu Þórunni og gaman að sjá íslenska fánann svona ofarlega á skortöflunni um miðbik mótsins.

Þó er vert að taka fram að mótið er gríðarlega sterkt og miklir reynsluboltar innan um nýgræðingana að þessu sinni og lokaúrtökumótið þekkt fyrir hversu sviptingasamt það er og að úrslitin ráðast oftsinnis ekki fyrr en á síðustu sentímetrunum.

Ólafía Þórunn þarf að vera í einu af efstu 20 sætunum til þess að tryggja sér kortið sitt og þar með fullan keppnisrétt á LPGA, sterkustu kvenmótaröð heims!!!

Haldið ykkur fast, því það er spennandi helgi framundan …. og fyrir Ólafíu er ekkert annað að gera heldur en að reyna að halda sér í núinu, eins og henni hefir tekist hingað til sbr. viðtal sem hún átti við GSÍ í gærkvöldi eftir 3. hringinn stórglæsilega, en þar sagði hún:

„„Mér líður mjög vel, ég hef náð að halda mér í „núinu“ og vera þolinmóð. Ég er að ná þeim markmiðum sem ég setti mér fyrir mótið og ég þarf að halda áfram að vera andlega sterk. Það er mikilvægast. Það voru hættulega mörg pútt sem voru nálægt því að fara ofaní en ég var með 25 pútt (í dag) í gær.“

Hvernig sem allt fer þá erum við öll svo stolt af Ólafíu Þórunni „okkar“ Kristinsdóttur og vonum að allt gangi jafnvel þá tvo hringi sem eftir eru og óskum henni velfarnaðar!!!

Sjá má stöðuna í lokaúrtökumóti LPGA 2016 með því að SMELLA HÉR: