Metfjöldi kylfinga á Íslandi – tæplega 17.000 skráðir í golfklúbba landsins

Kylfingar hafa aldrei verið fleiri en nú og eru 16.820 skráðir í golfklúbba víðsvegar um landið. Þetta er aukning um tæplega 400 kylfinga frá árinu í fyrra. Fjölgunin er hvað mest í golfklúbbum á höfuðborgarsvæðinu og Reykjanesinu.

Gott veðurfar, aukin markaðssetning og fjölbreyttara framboð á félagaaðild gætu verið líklegar skýringar á fjölguninni.

Þegar rýnt er í tölurnar þá kemur í ljós að aukningin er mest hjá fólki sem er 50 ára og eldri en sá hópur stækkar um heil 13% milli ára. Á móti er fækkun í hópi fólks milli 22-49 ára og nemur fækkunin um 7%. Einnig fækkar börnum og unglingum yngri en 14 ára um 12%.

Í dag eru 55% allra kylfinga eldri en 50 ára og í þeim aldurshópi eru flestir nýliðarnir. Þar sem færri nýliðar undir 50 ára byrja í golfi má segja að meðalaldur kylfinga sé að hækka verulega hér á landi. Meðalaldur kvenkylfinga er nú 52 ár og karlkylfinga 46 ár.

Hér að neðan má sjá hvernig þessi tæp 17.000 íslenski kylfingahópur er samsettur, skipt eftir aldri og kyni: 

Aldur                            Karlar                        Konur                         Samtals

9 ára og yngri              300                             171                              471

10-19 ára                      1347                            436                           1783

20-29 ára                     930                             118                             1048

30-39 ára                     1226                           213                             1439

40-49 ára                     2068                          759                             2827

50-59 ára                     2547                           1589                           4136

60 ára og eldri             3243                          1886                           5129

Samtals                  11.661                       5.172                      16.833

Heimild: GSÍ