Hver er kylfingurinn: Vaughn Taylor?

Vaughn Joseph Taylor fæddist 9. mars 1976 í Roanoke, í Virginíu og verður því 40 ára eftir u.þ.b. mánuð.

Sem krakki fluttist Vaughn til Georgíu þar sem hann spilaði golf í menntaskóla, Hephzibah High. Vaughn spilaði síðan golf með næststærsta háskóla í Georgíu, Augusta State University og útskrifaðist þaðan með gráðu í viðskiptafræði (ens. business admisnistration) 1999.

Í dag býr Vaughn enn í Augusta, Georgíu með eiginkonu sinni, Leot Chen, en nálægt foreldrum sínum.

Vaughn og Leot giftu sig 10. desember 2011.

Þau Leot og Vaughn eiga 2 ára son Locklyn Vaughn Taylor.

Vaughn Taylor varð atvinnumaður í golfi 1999. Hann spilaði á fyrstu árum sínum sem atvinnumaður á Hooters og Nationwide túrunum og hlaut þar dýrmæta reynslu áður en hann spilaði fyrsta árið sitt á PGA Tour 2004.

Vaughn er því einn af þeim sem varla telst „nýr strákur á PGA Tour“.

Taylor sigraði 4 sinnum á Hooters 1 sinni á Nationwide Tour og 3 sinnum á PGA Tour, í fyrsta sinn 2004 á Reno-Tahoe Open og síðan varði hann titil sinn í mótinu 2005. Svo í gær kom fyrsti sigurinn í yfir 10 ár þegar hann sigraði á AT&T Pebble Beach Pro-Am.

Vaughn Taylor var í Ryder Cup liði Bandaríkjamanna 2006 og hefir efst komist meðal 40 efstu á heimslistanum.

Í dag eftir sigurinn á AT&T Pebble Beach Pro-Am er hann nr. 100  á heimslistanum, fór upp um 337 sæti milli vikna.

Heimild: PGA Tour og Wikipedia