Forseti GSÍ í viðtali Akraborgarinnar: „Framtíðin björt í íslensku golfi.“

Í góðu viðtali þátttarstjórnanda Akraborgarinnar á X-inu við forseta GSÍ, Hauk Örn Birgisson, s.l. mánudag 11. janúar 2016 kom m.a. fram að framtíðin í íslensku golfi væri björt.

Umfjöllunarefni þáttarins var grein stjórnarmanns Golfklúbbs Reykjavíkur, Margeirs Vilhjálmssonar, sem staðhæfði í fyrirsögn á Kylfingi.is deginum áður að Haukur Örn, forseti GSÍ væri að segja af sér vegna skoðana forsetans í Markaðnum, blaði, sem er inni í Fréttablaðinu.

Svo sem flestir, sem koma nálægt golfi, vita var Haukur Örn nýlega endurkjörinn til tveggja ára og staðfestir í viðtali Akraborgarinnar að hann sé auðvitað ekkert að segja af sér – en fyrir þá sem eru ekki í miðju og hringiðu íslensks golfs eru svona rangar fyrirsagnir eins og í grein Margeirs bara villandi.

Margeir var í grein sinni á Kylfingi.is dónalegur, sagði viðtalið í Markaðnum við Hauk Örn „drottningarviðtal“ og líkti Hauki Erni við einræðisherrann Kim Jong Un í Norður-Kóreu. Hann endurtekur leikinn á Kylfingi.is í dag og er miður að hann sé með þessum hætti ítrekað að ráðast á forseta GSÍ og Kylfingur.is láti það viðgangast.

Golf 1, s.s. flestir sem látið hafa í sér heyra út af þessum skrifum eru virkilega ánægðir með störf Hauks Arnar og finnst ómaklega að honum vegið – Sjá m.a. grein Golf 1 s.l. sunnudag SMELLIÐ HÉR:   –  þeir skilja t.d. ekkert í því hvernig hægt sé að mistúlka skoðanir forseta GSÍ á mun á rekstrargrundvelli golfklúbba á Íslandi s.s. Margeir gerir.

Forseti GSÍ vildi hins vegar lítið tjá sig um orð Margeirs  í viðtalinu á Akraborginni, fannst að Margeir yrði bara að hafa þau fyrir sjálfan sig; Sér væri alveg sama hvaða skoðun Margeir hefði á sér og svæfi alveg á nóttunni þó Margeir væri ósáttur við hann eða hans störf.

Það sem forsetanum fannst hins vegar leiðinlegt í skrifum Margeirs, ekki bara í greininni með röngu fyrirsögninni, heldur almennt, var að hann lýsti alltaf ákveðinni bölsýni og einhverju svartnætti framundan í íslensku golfi.

Taka má heils hugar undir með forseta GSÍ að  framtíð íslensks golfs er björt og hefir í lengri tíma ekki verið bjartari. Ber þar hæst frábæran árangur Ólafíu Þórunnar Kristinsdóttur, sem komin er inn á aðra sterkustu kvenmótaröð heims og eins þá staðreynd að aldrei hafa fleiri íslenskir kylfingar verið í bandaríska háskólagolfinu og staðið sig framúrskarandi vel þar – um það getur Golf 1 borið, sem hefir verið með eina öflugustu umfjöllunina um háskólakrakkana okkar og verður henni svo sannarlega fram haldið.

Til þess að hlusta á viðtal við Hauk Örn Birgisson, forseta GSÍ í þættinum Akraborg á X-inu SMELLIÐ HÉR: