Íslandsbankamótaröðin 2015: Spennandi Íslandsmót framundan og bein útsending

Það verður mikið um að vera um helgina þegar golftímabilið hjá yngstu afrekskylfingum landsins nær hámarki á Íslandsbankamótaröðinni. Sjálft Íslandsmótið fer fram á Korpúlfsstaðarvelli og samhliða því fer fram tveggja daga mót á Áskorendamótaröðinni á Bakkakotsvelli.
Alls eru 180 kylfingar skráðir til leiks á mótin tvö, en Íslandsmótið verður leikið á Sjónum og Ánni á Korpúlfsstaðarvelli. Keppni hefst á föstudaginn en mótið telur til stiga á heimslista áhugakylfinga.

Í fyrsta sinn í sögu Íslandsmótsins verður sýnt beint frá viðburðinum í sjónvarpsútsendingu. Á vef Sporttv.is verður hvert einasta högg á 6. braut Korpúlfsstaðarvallar sýnt á síðustu tveimur keppnisdögunum, laugardag og sunnudag.

Tvær myndavélar verða notaðar til þess að sýna frá þessari glæsilegu holu og golfsérfræðingur verður á svæðinu til þess að lýsa því sem fyrir augu ber. Sannarlega glæsilegt framtak og áhugaverð tilraun. Hægt er að fylgjast með gangi mála frá 6. holunni á laugardag og sunnudag með því að SMELLA HÉR: 

Að mótinu loknu á sunnudag verður sameiginlegt lokahóf hjá keppendum á Íslandsbankamótaröðinni og Áskorendamótaröðinni í golfskálanum í Korpunni. Athöfnin hefst kl. 20.00 þar sem boðið verður upp á léttar veitingar samhliða verðlauna afhendingunni á Íslandsmótinu. Verðlaunafhending fyrir Áskorendamótaröðina í Bakkakoti fer einnig fram í Korpunni og hefst kl. 20.00.

Fjölmiðlastjarnan Auddi Blö mun stýra lokahófinu. Hann mun eflaust fá harða keppni frá lokakaflanum á Opna breska meistaramótinu sem verður að sjálfsögðu í beinni útsendingu í Korpunni fyrir þá sem það kjósa.
Það verður án efa hörð barátta um titlana sem eru í boði um helgina en keppt verður í þremur aldursflokkum hjá báðum kynjum, 14 ára og yngri, 15–16 ára og 17–18 ára.

Leikið verður af hvítum teigum eða öftustu keppnisteigum í tveimur elstu aldursflokkunum hjá drengjunum en af bláum teigum hjá stúlkunum í tveimur elstu aldursflokkunum. Leikið er af rauðum teigum í yngsta aldursflokknum hjá stúlkunum og af bláum teigum í 14 ára og yngri flokknum hjá drengjunum.