Eimskipsmótaröðin 2015 (4): Úrslit í 8 manna undanúrslitum

Það er ljóst hvaða kylfingar mætast í undanúrslitum í kvennaflokki á Íslandsmótinu í holukeppni á Eimskipsmótaröðinni. Mótið fer fram á Jaðarsvelli á Akureyri og voru aðstæður góðar í dag líkt og í gær.

Signý Arnórsdóttir úr GK og Heiða Guðnadóttir GM eigast við en Signý hefur tvívegis sigrað í þessari keppni en Heiða aldrei. Í hinni undanúrslitaviðureigninni leika Ólafía Þórunn Kristinsdóttir úr GR og Anna Sólveig Snorradóttir úr GK.

Ólafía er ríkjandi Íslandsmeistari í golfi en hún lagði Tinnu Jóhannsdóttur úr GK í morgun í riðlakeppninni í úrslitaleik um hvor þeirra færi í undanúrslit. Tinna hafði titil að verja á mótinu.

Það er ljóst að nýtt nafn verður skrifað á Íslandsmeistarabikarinn í holukeppni í karlaflokki. Benedikt Sveinsson úr Keili sló út Kristján Þór Einarsson úr GM sem hafði titil að verja í átta manna úrslitum í dag á Jaðarsvelli á Akureyri.
Gríðarleg spenna var í átta manna úrslitunum og fóru tvær viðureignir í bráðabana. Úrslitin í viðureign Benedikts og Kristjáns réðust á 21. holu.
Það tók sinn tíma að útklá viðureignina hjá Stefáni Má Stefánssyni úr GR og heimamanninum Eyþóri Hrafnari Ketilssyni úr GA. Stefán hafði að lokum betur á 23. holu með því að fá par. Stefán tapaði í undanúrslitum í fyrra gegn Bjarka Péturssyni í þessari keppni.
Axel Bóasson úr Keili hafði betur gegn félaga sínum úr Keili, Sigurþóri Jónssyni – 4/3.
Theodór Emil Karlsson úr GM hafði betur gegn Daníel Hilmarssyni úr GKG í hörkuviðureign, 2/0.
Axel og Stefán Már mætast í undanúrslitum, og Benedikt leikur gegn Theodóri. Undanúrslitaleikirnir fara fram fyrir hádegi á sunnudag. Sigurvegararnir mætast í úrslitum eftir hádegi á sunnudag og þeir sem tapa leika um bronsið á sama tíma.
Úrslitin í 8-manna viðureignum dagsins.
Kristján Þór Einarsson GM
Benedikt Sveinsson GK – Benedikt sigraði á 21. holu.
Theodór Emil Karlsson GM 2/0
Daníel Hilmarsson GKG
Stefán Már Stefánsson GR – Stefán sigraði á 23. holu.
Eyþór Hrafnar Ketilsson GA
Axel Bóassson GK 4/3
Sigurþór Jónsson GK

Undanúrslitaleikirnir fara fram á sunnudagsmorgun og úrslitaleikirnir fara fram eftir hádegi.
Skor keppenda og úrslit úr leikjum má sjá með því að SMELLA HÉR:

Eimskip, mikill styrktaraðili golfs á Íslandi. Mynd: Golf 1.