Gleneagles e.t.v. til sölu fyrir 200 milljónir punda

Gleneagles hótelið og golfstaður sem þar er við hefir fengið tilboð upp á 200 milljónir punda frá áhugasömum kaupendum.

Það er fyrirtækið Diageo, sem m.a. á Johnnie Walker og Guinness, sem er eigandi 5 stjörnu Gleneagles hótelsins og golfstaðarins.

Diageo hefir nú falið JLL eignamiðlunarfyrirtækinu að kanna hver áhuginn er áður en ákvörðun verður tekin um hvort staðurinn verði seldur.

Tvívegis hefir komið til greina að selja Gleneagles vegna tilboða sem bárust, það síðasta 1998, en bæði tilboðin þóttu of lág.

Bandaríska fyrirtækið KSL Capital Partners, sem m.a. á Belfry, er talið vera eitt af þeim fyrirtækjum sem sýnt hafa Gleneagles áhuga.

Talsmaður Diageo lét m.a. hafa eftir sér: „Gleneagles er eitt af bestu lúxushótelum Bretlands og einn af glæsilegustu golfstöðum í heiminum.  Það eru margir sem myndu elska að eiga Gleneagles og við höfum fengið margar fyrirspurnir og auðsýndan áhuga gegnum árin, sérstaklega eftir að Ryder bikars keppnin fór fram hér.„

Hótelið opnaði dyr sínar fyrir gestum 1924 og hefir verið lýst sem áttunda undur veraldar.  Það var byggt af Caledonian járnbrautarfélaginu og meðal eigna þess er einkajárnbrautarstöð, sem kom sér vel þegar Ryder bikars keppnin var haldin.

Í Gleneagles eru 3 golfvellir: PGA Centenary völlurinn, Kings völlurinn og Queens völlurinn. Komast má á heimasíðu Gleneagles með því að SMELLA HÉR: