Nýju strákarnir á Evróputúrnum 2015: Adrian Otaegui (23/27)

Það var spænski kylfingurinn Adrian Otaegui sem varð í 5. sæti á lokaúrtökumóti Evrópumótaraðarinnar, sem fram fór á PGA Catalunya golfstaðnum í Girona á Spáni  15.-20. nóvember 2014.

Birgir Leifur okkar Hafþórsson spilaði einnig í lokaúrtökumótinu en komst því miður ekki í gegnum niðurskurð að þessu sinni.

Adrian Otaegui fæddist 21. nóvember 1992 í San Sebastian á Spáni og er því 22 ára.  Hann var byrjaður að slá golfbolta 3 ára og 9 ára var hann kominn með 6 í forgjöf. Forgjöf hans er 3,8 í dag. Hann var aðeins 19 ára og 24 daga þegar hann tryggði sér kortið sitt og var næstyngsti korthafinn á Evróputúrnum á eftir Matteo Manssero keppnistímabilið 2012.

Á Spáni er Otagui í Goliburu golfklúbbnum.

Adrian æfði sem sem barn og unglingur í klúbbnum heima hjá sér í Fuenterrabia, á Spáni þar sem Ryder Cup fyrirliðinn José Maria Olazabal er fæddur.  Olazabal hefir kennt Adrian frá unga aldri. Adrian lítur mjög upp til Olazabal og var eitt sinn haft eftir honum að ef hann gæti orðið hálft eins góður og Olazabal yrði hann mjög hamingjusamur.   Sem stendur býr Adrian í Biarritz í Frakklandi, en aðeins er spölkorn þaðan til Fuenterrabia og Adrian Otaegui í góðu sambandi við kennarann sinn.

Á áhugamannsferli sínum vann Adrian 11 titla þ.á.m. Boys Amateur Championship í Kilmarnock (Barassie) Golf Club, í Skotlandi árið 2010.

Á fyrsta móti sem Otagui tók þátt í á Evróputúrnum í maí 2011 þ.e. á Iberdrola Open varð hann T-16. Hann átti í erfiðleikum, nýliðaár sitt 2011 en komst aftur á Evróputúrinn eftir að hann varð í 7. sæti á peningalista Áskorendamótaraðarinnar 2013, en það átti hann að þakka þremur 2. sætis áröngrum það ár á Áskorendamótaröð Evrópu.

S.l. ár, 2014 var fremur dauflegt hjá Otagui en hann hélt kortinu sínu með glæsilegu spili í Q-school þar sem hann varð í 5. sti s.s. áður segir.

Meðal áhugamála Otagui eru bílar, ólíkir menningarheimar, tónlist og íþróttir almennt.

Sem stendur er Otagui í 434. sæti á heimslistanum.