Sænsk lúxuseyja – fyrrum eign Tiger – til sölu

Sænsk lúxuseyja, sem áður var í eigu kylfingsins Tiger Woods, er nú til sölu.

Þetta er 62-ekru eyja, í Mälaren vatni í Svíþjóð og var fyrrum heimili Tiger og fyrrum eiginkonu hans Elínar Nordegren, þau 6 ár sem þau voru gift.

Elín Nordegren og Tiger

Á eigninni eru m.a. 6 golfholur, glæsihýsi, veiðihús og flugvöllur.

Á eyjunni er einnig hafnarlægi, einkaferja, sögufrægur kastali og graslendi fyrir hesta, hesthús og tvær litlar Skinnpälsarna eyjur, með vatnasvæði sem telur 500 ekrur.

Verðandi eigendur verða þó að koma með sínar eigin kylfur því eignin er seld án innanstokksmuna.

Sabine Rollinger, hjá Vladi Private Islands, sem er með eyjuna á söluskrá sagði m.a.: „Þessi eyja var eign  Tiger Woods, en eftir skilnað sinn þarfnaðist hann ekki eyju lengur í Svíþjóð.“  

„Þetta er einstök, einkaeyja, þar sem allt er algjörlega prívat.  Innifalin er m.a. einkahöfn, ósnertir skógar, gullfallegir trjálundar, opin svæði, fallegt útsýni yfir vatn og smekklega hannaður aðalbústaður, í raun glæsihýsi.

„Á eyjunni er einnig flugvöllur og sex holu golfvöllur. Einkavillan, veiðihúsið og hesthúsin eru á aðaleyjunni og umlukin háu limgerði.“

„Hér er hægt að lenda einkaflugvélinni, spila fótbolta, vera á hestbaki eða í golfi.“

„Hundrað metra frá villunni er einka- og vernduð höfn, og 50 metra löndunarpláss, þar sem er nægt pláss fyrir eigin báta eða báta vinafólks.“

„Þetta er staður þar sem hægt er að fara í frábærar stangveiðiferðir í eigin stöðuvatni, fara í bátsferð út á einhverjar af 1000 eyjum Mälaren við Stokkhólm.“