GK: Daði Janusson býður sig fram í stjórn Keilis

Á heimasíðu Golfklúbbsins Keilis má lesa um framboð Daða Janussonar til stjórnar Keilis.

Hér fer framboðsgrein Daða:

„Kæru félagar

Daði Janusson heiti ég og býð mig fram í stjórn Keilis. Ég fékk mitt fyrsta golfsett fyrir 10 árum síðan og fljótlega eftir það hóf ég að sækja golftíma hjá Keili. Ég er algerlega helbitinn golfari í dag og hef mikinn áhuga á íþróttinni og öllu sem henni tengist. Mig langar að virkja þennan áhuga enn frekar og starfa í þágu Keilis.

Golfklúbburinn Keilir stendur á tímamótum. Tekist hefur að sigla í gegnum ólgusjó hrunsins og á stjórn klúbbins undanfarin ár mikið lof skilið fyrir þann árangur. Framundan eru spennandi tímar á mörgum vígstöðvum og ber þar helst að nefna breytingar á skipulagi Hvaleyrarvallar. En það bíða einnig ýmsar áskoranir í rekstri klúbbins, líkt og í öllum rekstri. Þessum spennandi tímum og áskorunum sem framundan eru langar mig að vera hluti af.

Ég er verkfræðingur að mennt, en ég lauk meistaranámi í framleiðsluverkfræði og stjórnun frá KTH háskóla í Stokkhólmi, Svíþjóð, vorið 2011. Eftir námið stofnaði ég og rak eigið fyrirtæki ásamt vini mínum og Keilisfélaga Daníeli Rúnarssyni. Þetta fyrirtæki, Kasmír sf., er enn starfandi í dag. Í dag er ég hins vegar í fullu starfi hjá Beringer Finance, en félagið sinnir fjármálaráðgjöf.

Ég er fæddur í Köln, Þýskalandi, og uppalinn á Álftanesi en bý nú á Arnarhrauninu hér í Hafnarfirði. Sambýliskona mín heitir Guðríður Steingrímsdóttir og eigum við von á okkar fyrsta barni núna í febrúar.

Kæru Keilisfélagar, framtíðin er björt. Ég hvet ykkur til að mæta á aðalfund klúbbsins, þriðjudaginn 9. desember, og taka þannig beinan þátt í því góða starfi sem hér er unnið. Mig langar einnig að biðja ykkur um að veita mér ykkar atkvæði og umboð til að starfa í þágu klúbbsins í stjórn hans.

Kærar þakkir,
Daði Janusson