Evróputúrinn: Brooks Koepka nýliði ársins 2014

Sir Henry Cotton nýliðaverðalaun Evrópumótaraðarinnar voru fyrst veitt árið 1960 og höfðu þar til á síðasta ári aldrei verið veitt Bandaríkjamanni þ.e. allt þar til Peter Uihlein tók þau í fyrra.

Og nú er annar Bandaríkjamaður orðinn nýliði ársins í Evrópu: Brooks Koepka.

„Það væri frábært ef hann (Uihlein) afhenti mér verðlaunin (fyrir að vera nýliði ársins)“ sagði Koepka eftir glæstan sigur á Turkish Airlines Open, næstsíðasta mót í Race to Dubai.

„Þetta er ótrúlegt.  Hann (Uihlein) kom hingað 5-6 mánuðum á undan mér. Markmiðið hjá mér var alltaf að koma hérna megin Atlantsála og gera það mesta úr veru minni hér.“

Og það hefir hinn 24 ára nýliði Evrópumótaraðarinnar 2014 svo sannarlega gert. Koepka var líka tilnefndur til nýliða verðlaunanna á PGA Tour í ár, en Chesson Hadley hlaut þau.

Í gær eftir að hafa verið útnefndur nýliði Evrópumótaraðarinnar sagði Koepka:

„Að vinna titilinn nýliði ársins hefir svo mikla þýðingu fyrir mig.  Ég hef unnið mikið á þessu ári og að sjá árangurinn er gaman. Að enda árið með sigri í Tyrklandi hefir gert þetta ár mjög sérstakt og það hefir verið markmið sem ég hef unnið að frá því að ég kom á túrinn og þetta var markmiðið í upphafi árs.“

Koepka varð í 8. sæti á peningalista Evrópumótaraðarinnar þökk sé sigri hans í Tyrklandi og 4 öðrum topp-10 áröngrum.  Þetta er fyrsta fulla keppnistímabil Koepka  á Evrópumótaröðinni.

Koepka komst á Evrópumótaröðina 2013 eftir 3 sigra á Áskorendamótaröðinni. Á síðasta keppnistímabili var hann með 2 topp-10 árangra og varð í 113. sæti á peningalistanum.

Hér má loks sjá kynningu Golf 1 á nýliða ársins 2014 á Evrópumótaröðinni – Brooks Koepka SMELLIÐ HÉR: