Ólafur Björn 3 yfir pari – Þórður Rafn átti erfiða byrjun í Valencía

Ólafur Björn Loftsson, NK hóf leik á 2. stigi úrtökumóts fyrir Evrópumótaröðina á 3 yfir pari, 75 höggum á Campo del Golf El Saler, í Valencia á Spáni. Hann er sem stendur í 36. sæti sem hann deilir með 6 öðrum.  Á hringnum fékk Ólafur Björn þrefaldan skolla á par-4 2. holuna (11. holu hans á hringnum) heil 7 högg og síðan 2 fugla og 2 skolla.  Um hring sinn sagði Ólafur Björn m.a.:

„Lék á 75 (+3) höggum á fyrsta hring úrtökumótsins á Spáni. Það var mjög hvasst í dag og aðstæður afar krefjandi. Ég var býsna ánægður með spilamennskuna mína, hélt boltanum vel í leik og átti fullt af góðum höggum. Ég sló reyndar slæmt högg á 11. holu dagsins sem reyndist dýrkeypt en ég svaraði því þó með tveimur fuglum á næstu holum. Mér fannst erfitt að stjórna hraðanum í púttunum en flatirnar voru nokkuð hraðari en á æfingadögunum og svo spilaði vindurinn einnig stórt hlutverk. Fá pútt duttu í dag en ég á það bara inni á næstu hringjum. Held áfram að spila inn á styrkleikana og slá eitt högg í einu. Fer út kl. 9:35 í fyrramálið (þ.e. í dag)  af 1. teig.“

Þórður Rafn Gissurarson, GR. Mynd: Golf 1

Þórður Rafn Gissurarson, GR, sem þátt tekur í sama úrtökumóti átti mjög erfiða byrjun, lék á 11 yfir pari, 83 höggum og afar óvenjulegt að sjá svona hátt skor hjá Þórði Rafni, sem búinn er að spila sérlega vel í ár. Það voru einkum 7. og 13. holan sem léku Þórð grátt á par-4 7. holuna fékk Þórður 9 högg og á par-4 13. holuna var Þórður Rafn með skramba. Þórður tók þetta aðeins aftur með 2 fuglum, en var jafnframt með 4 skolla.  Ekki dagur Þórðar Rafns.  Hann vermir síðasta sætið eftir 1. dag.

Birgir Leifur Hafþórsson, GKG. Mynd: gsimyndir.net

Birgir Leifur Hafþórsson, GKG,  lék á 1 yfir pari, 73 höggum og er T-17 eftir 1. dag,  líkt og Golf 1 var búið að greina frá SMELLIÐ HÉR:

Fylgjast má með íslensku keppendunum á El Saler í Valencía á Spáni með því að SMELLA HÉR: