Íslenska kvennalandsliðið lauk leik í 29. sæti á HM kvenna í Japan

Íslenska kvennalandsliðið, skipað þeim Guðrúnu Brá Björgvinsdóttur, GK; Ólafíu Þórunni Kristinsdóttur, GR og Sunnu Víðisdóttur, GR lauk í dag leik í 29. sæti í liðakeppninni á Espirito SantoTrophy af 50 liðum sem er góður árangur!  Íslenska kvennalandsliðið deildi 29. sætinu með kvennalandsliðum Suður-Afríku og Hong Kong. Heildarlokaskor íslenska liðsins voru 588 högg.

Það var ástralska kvennalandsliðið sem sigraði á samtals 547 höggum;  kanadíska kvennalandsliðið varð í 2. sæti 2 höggum á eftir á 549 höggum og það danska í 3. sæti á samtals 556 höggum.

Sjá má lokastöðuna í liðakeppninni með því að SMELLA HÉR: 

Um gærdaginn (þ.e. 3. keppnisdag) og lokahring Espirito Trophy í dag sagði Úlfar Jónsson, landsliðsþjálfari:
„Þetta var ágætur dagur hjá stelpunum. Markmiðið var að leika undir pari í dag (þ.e. í gær) og klifra aðeins upp töfluna. Þær voru nálægt því og léku á parinu í dag og eru í 30. sæti. Það er jákvætt að þær hafa bætt sig um 2-3 högg á hverjum degi og við stefnum á að gera það sama á morgun (þ.e. í dag 4. keppnisdag). Þær eru mjög nálægt því að skora lágt.

Aðstæður hafa verið mjög góðar til að spila golf, þó mjög heitt í dag og rakt og útlit fyrir þrumuveður seinnipartinn, en það lítur út fyrir þessa stundina að allir nái að klára hringinn í dag.

Lokahringurinn er á morgun (þ.e. í dag) og munum við þá leika á Oshitate vellinum.“

Eftir hringinn í dag skrifaði Úlfar síðan eftirfarandi á facebook síðu sína:

„HM kvenna þá lokið í Japan og 29. sætið er niðurstaðan. Stelpurnar gáfu allt í þetta og voru frábærir fulltrúar Íslands! — at 軽井沢町.“

Alls lék íslenska kvennalandsliðið Oshitate golfvöllinn sem Úlfar gat hér að ofan 2 sinnum (þ.e. á 2. og 4. þ.e. lokakeppnisdegi) en merkilegt við þann völl er m.a. 18. holan, sem er par-6.  Guðrún Brá var sú eina af íslensku stelpunum, sem tókst að fá fugl á þá holu (á 2. hring) en var síðan á pari þ.e. 6 höggum lokakeppnisdaginn, líkt og Ólafía Þórunn og Sunna báða keppnisdagana. Gaman að svona „öðruvísi“ golfholum – og það á heimsmóti!!!

Í einstaklingskeppninni deildu Guðrún Brá og Ólafía Þórunn  58. sæti ásamt 5 öðrum kylfingum; léku báðar á 6 yfir pari, 294 höggum; Guðrún Brá (75 72 73 74) og Ólafía Þórunn (74 75 71 74).   Sunna lék á 21 yfir pari, 309 höggum (75 81 78 75) og fór við flotta lokahringinn upp á skortöflunni um 12 sæti þ.e. lauk leik í 107. sæti, en hún var T-119 í gær.

Í einstaklingskeppninni sigraði kanadíska stúlkan Brooke Henderson, en hún lék á samtals 269 höggum (66 68 66 69).

Til þess að sjá lokastöðuna á HM kvenna í Japan í einstaklingskeppninni SMELLIÐ HÉR: 

Þetta er hlutfallslega besti árangur íslenska kvennalandsliðsins á HM kvenna frá upphafi, því jafnvel þó árið 1994 hafi íslenska kvennalandsliðið orðið í 24. sæti, þá voru aðeins 29 þátttökuþjóðir þá, en voru 50 í ár.

 Glæsilegur árangur þetta hjá íslenska kvennalandsliðinu!!!  Liðsstjóri í ferðinni var Haukur Örn Birgisson, forseti GSÍ.