8 keppa um að fá að hanna nýja golfvöllinn í Rio De Janeiro fyrir Olympíuleikanna 2016 – tafir á að tilkynna hver hlýtur verkefnið!

Þegar samþykkt var að golf yrði íþróttagrein á Olympíuleikunum í Ríó de Janeiro, í Brasilíu 2016 lá ljóst fyrir að byggja yrði keppnisvöll sem hæfði tilefninu. Efnt var til samkeppni og eru 8 aðilar sem keppast um að fá hönnunarverkefnið. Þar fremst í flokki eru Jack Nicklaus og Annika Sörenstam, sem fyrirfram voru talin sigurstranglegust.

Aðrir sem eru um hituna hafa hins vegar verið að sækja í sig veðrið, en það eru: Greg Norman sem sækist eftir hönnunarverkefninu ásamt Lorenu Ochoa; Golfgoðsögnin Gary Player, en vellir hans eru þekktir um allan heim og ástralska liðið með Karrie Webb, Peter Thompson og Ross Perrett innanborðs.

Eins þykir valnefndin nú „svag“ fyrir Robert Trent Jones II, sem fengið hefir heimamanninn og brasilíönsku golfgoðsögnina Mario Gonzalez í lið með sér.

Aðrir ólíklegri kandídatar eru Gil Hanse, sem fengið hefir Amy Alcott til liðs við sig; Martin Hawtree, sem sá um endurbætur á vellinum fyrir Opna breska og Tom Doak, sem hannað hefir geggjaða linksara… en jafnvel þau er ekki hægt að útiloka.

Svo virðist sem ofangreindir 8 aðilar keppist um að hljóta heiðurinn af hönnuninni því sett hefir verið $ 300.000,- þak á þóknun fyrir hönnunina; en skyssur og vinnuferðir þessara 8 aðila, sem notaðar eru til gerðar 45 mínútna kynningarmyndskeiðs eru nú þegar taldar hlaupa á $ 100.000,- hjá hverjum um sig.

Valnefndin, sem samanstendur af 3 brasilíönskum embættismönnum og Peter Dawson frá R&A, hefir frestað að tilkynna hver hljóti verkefnið um 1 mánuð…. m.a. vegna þess að ekki er búið að ganga frá kaupum á 210 ekru landinu þar sem til stendur að byggja golfvöllinn!