Sunna: „Viðbrigði að koma úr 25°“

Sunna Víðisdóttir, GR, varð í 2. sæti á 1. móti Eimskipsmótaraðarinnar, Egils Gull mótsins uppi á Skaga nú s.l. helgi. Hún lék hringina 3 á 18 yfir pari 234 höggum (78 75 81). Golf 1 tók stutt viðtal við Sunnu:

Golf 1: Til hamingju með árangurinn upp á Skaga – Eru mikil viðbrigði að vera aftur farin að spila hér á landi miðað við hitann í Norður-Karólínu?

Sunna:  Þetta er auðvitað allt annað.  Ég var að koma frá Bandaríkjunum úr 25° hita þarna á miðvikudeginum fyrir mótið, þannig að þetta var frekar erfitt.

Golf 1:  Já, nú voru aðstæður til leiks erfiðar vegna veðurs. Fannst þér veðrið hafa áhrif á leik þinn?

Sunna:  Veðrið hafði mikil áhrif á skorið. Sérstaklega var par-5 7. brautin erfið.  Ég tók t.d.  dræver 7-tré 7-tré og átti samt 110m eftir að stöng, sem ég tók 21° hálfvita  á lokadaginn, en venjulega slæ ég 160 metra með honum. Kylfuvalið varð allt annað.

Golf 1: Hvað var það sem var að ganga upp í leik þínum, sem varð til þess að þú náðir 2. sætinu?

Sunna: Ég var að gera lítið af mistökum. Púttin voru ekkert sérlega góð.  Drævin voru fín og ég er ánægðust með chip-in.

Golf 1: Nú varst þú forgjafarlægst í mótinu, með +0,5 í forgjöf – Hvernig fórstu að lækka svona í forgjöf?

Sunna:  Ég lækkaði mikið í forgjöf úti. Vellirnir aðeins lengri og maður fær hærri vallarforgjöf, þannig að forgjöfin lækkaði.

Golf 1: Hvernig fannst þér Garðavöllur?

Sunna:  Fínn, Hann kom á óvart. Hann er  eini völlurinn sem ég hef spilað frá því ég kom heim.  Ég tók einn æfingahring seinnipartinn á fimmtudaginn  Annars hef ég lítinn samanburð við aðra velli.

Golf 1: Hvernig lítur dagskráin út hjá þér í sumar – ætlar þú að taka þátt í öllum mótunum á Eimskipsmótaröðinni?

Sunna:  Er að fara til að keppa í Wales núna í byrjun júní og missi því af næsta móti úti í Eyjum. – Annars er stefnan að taka þátt í flestum mótanna.