32 Evróputúrs kylfingar með á Masters

Nú um þessar mundir er kylfingum að berast einfalt bréf frá Augusta National þar sem þeim er boðið að taka þátt í 1. risamóti ársins 2017 og þeir beðnir um að svara….

þ.e. þeim er boðið, sem unnið hafa til þess.

Alls eru 32 kylfingar af Evróputúrnum, sem boðið hefir verið.

Austurríski kylfingurinn Bernd Wiesberger er einn af 10 kylfingum á Evróputúrnum, sem fengið hafa bréfið á grundvelli þess að vera meðal efstu 50 á heimslistanum. Þetta er í 3. skipti sem hann tekur þátt.

Danny Willett, tekur þátt því hann er jú að verja titil sinn og 21 aðrir kylfingar hafa öðlast þátttökurétt vegna annarrra atriða.

Tyrrell Hatton, Alex Noren, og Thomas Pieters munu allir keyra niður Magnolia Lane í fyrsta sinn, en þeir keppa í fyrsta sinn á Augusta National.

Noren, er kominn á Masters vegna þess að hann vann sig upp í 9. sæti á heimslistanum með glæsilegum 4 sigrum á Evróputúrnum 2016, sem er besta keppnistímabilið á ferli hans til þessa.

Hatton varð í sætinu á eftir Noren á stigalista Evróputúrsins, Race to Dubai.

Pieters, var aðalsstjarnan sem nýliði í Ryder bikars liði Evrópu og hefir vakið verðskuldaða athygli í Bandaríkjunum fyrir vikið.

Við erum e.t.v. aðeins stödd á 1. viku ársins, en stórstjörnur golfsins eru svo sannarlega byrjaðar að undirbúa sig undir eina mesta golfveislu ársins á Augusta National, The Masters risamótið, sem fram fer 4.-9. apríl n.k. á Augusta National….

….. og nú fer alltaf að styttast í golfsumarið með hækkandi sól.