Nýju strákarnir á Evróputúrnum 2020: Jake McLeod (14/28)

28 kylfingar tryggðu sér fullan spilarétt á Evrópumótaröðinni og mun Golf 1, líkt og á undanförnum vera með kynningu á þeim.

Meirihluti þeirra sem komst á Evróputúrinn, með þátttöku sinni í lokaúrtökumótinu eru reynsluboltar, sem margir hafa spilað á Evróputúrnum og í nokkrum tilvikum einnig bestu mótaröð í heimi PGA TOUR og voru þáttakendur í lokaúrtökumótinu því sérlega sterkir í ár.

Lokaúrtökumótið fór fram á Lumine golfstaðnum á Spáni, dagana 15.-20. nóvember 2019 að þessu sinni.

Í fyrsta sinn í golfsögunni voru 3 íslenskir keppendur á lokaúrtökumótinu: Andri Þór Björnsson, GR; Bjarki Pétursson,GB og Guðmundur Ágúst Kristjánsson, GR. Því miður komst enginn þeirra á Evróputúrinn að þessu sinni.

Golf 1 hefir þegar kynnt þá 4, sem rétt sluppu inn á Evróputúrinn og urðu T-25 og þá 8 kylfinga sem deildu 17. sætinu. Nú er komið að því að kynna þá 4, sem deildu 13. sætinu en það eru: Johannes Veerman frá Bandaríkjunum, Garrick Porteous, frá Englandi, Jake McLeod, frá Ástralíu og Marcus Armitage frá Englandi.

Armitage hefir þegar verið kynntur og í dag er það Jake McLeod sem verður kynntur en hann lék líkt og hinir 3 áðurgreindu á samtals 14 undir pari, 414 höggum og varð því T-13 (eða uppreiknað í 15. sæti).

Jake McLeod fæddist þann 13. ágúst 1994 í Townsville, Queensland, Ástralíu og er því aðeins 25 ára.

Hann er 81 kg.

Heima í Ástralíu er hann í Royal Queensland golfklúbbnum.

McLeod gerðist atvinnumaður í golfi árið 2015.

Fyrsti sigur hans sem atvinnumanns kom árið 2018 á the New South Wales Open á Ástralasíu túrnum.

Sá sigur varð til þess að hann fékk tímabundinn spilarétt á Evróputúrnum 2019 og eins þátttökurétt á Opna breska risamótinu 2019, þar sem hann komst ekki gegnum niðurskurð.

Eftir að hafa orðið T-13 í Q-school ávann hann sér spilarétt áframhaldandi spilarétt á Evróputúrnum 2020.

McLeod er sem stendur nr. 306 á heimslistanum.