Caroline talar um sambandsslit sín við Rory

Merkilegt að stúlkan sem sagðist aldrei ætla að tjá sig um sambandsslit sín við nr. 1 á heimslistanum í golfinu, Rory McIlroy, er enn og aftur í fréttum að tjá sig um …. einmitt sambandslit sín við Rory.

Tennisstjarnan Caroline Wozniacki talar í löngu viðtali við The Indipendant um sambandsslit sín við Rory og hversu erfið þau voru henni.

„Í huga mér átti ég allt fram að þessu augnabliki,“ sagði Caroline.

„Ég átti frábæran tennisferil, ég var að fara að gifta mig, ég átti fullkomna fjölskyldu.  Allt var frábært. Það var ekkert mér mótdrægt. Ég var hamingjusöm, mjög hamingjusöm.“

„Svo allt í einu gerist eitthvað sem maður býst ekki við. Maður sér bara heimsmynd sína fara á á hvolf, í raun á einni sekúndu. Ég held að ég hafi ekki vitað hversu sterk ég var þar til þetta gerðist. Og ég vissi ekki hversu mikið ég gæti tekið. Manni líður eins og einhver náinn hafi dáið.“

Þrátt fyrir að þetta hafi verið skelfileg lífsreynsla þá segir nr. 5 á heimslistanum í kventennis-num að reynslan hafi kennt sér mikið um lífið.

„Maður verður að fara í gegnum þetta. Ég held að þetta hafi kennt mér svo mikið. Ég held að ég hafi fullorðnast mikið á stuttum tíma. Ég gerði mér líka grein fyrir því hverjir eru alltaf til staðar fyrir mig og hverjir eru aðeins í lífi mínu þegar allt er gott,“sagði Caroline.

„Og maður lærir mikið um lífið. Maður verður að njóta þess meðan það er. Maður verður að njóta allra frábæru augnablikanna. Ég hugsa nú að þegar ég lít aftur myndi ég ekki vilja hafa verið án þessa(rar lífsreynslu). Vegna þess að nú veit ég virkilega að ég er sterk, ég veit hvað ég vil, ég veit hvað ég læt bjóða mér og hvað ekki; hvað ég þarfnast og þarfnast ekki.“