Birgir Leifur tekur þátt í úrtökumóti fyrir Web.com

Birgir Leifur Hafþósson, GKG, tekur þátt í úrtökumóti fyrir Web.com sem fram fer í Callaway Gardens Golf Club í Georgíu dagana 22.-25. október n.k. Callaway Gardens er 2630 ha íþróttasvæði í Pine Mountain, Georgíu, þar sem eru tveir golfvellir: Mountain View og Lake View.

Birgir Leifur kemur til með að spila Mountain View golfvöllinn, en þar fór Buick Challenge fram á árunum 1991-2002.

Frá Mountain View golfvellinum í Georgíu.

Sigurvegarar þess móts eru m.a. Davis Love III, David Duval, Steve Elkington, David Toms og Jonathan Byrd.

Mountain View völlurinn er par-72 með þröngum brautum og háum grenitrjám. Einkennishola Mountain View er par-5 7. brautin þar sem bæði teig- og aðhögg eru slegin yfir vatn.  Sjá má skorkort vallarins með því að SMELLA HÉR: 

Úrtökumótið sem Birgir Leifur spilar á er 1.stigs mót en alls eru stigin 3 auk eins undanúrtökumóts og hann því alls ekki búinn að tryggja sér keppnisrétt á Web.com mótaröðinni þó hann verði meðal efstu 20 í mótinu, en þeim er tryggður keppnisréttur á næsta stigi úrtökumótsins.

Birgir Leifur er sem stendur  í Bandaríkjunum við æfingar.

Birgir Leifur er þegar kominn á 2. stig úrtökumóts fyrir Evrópumótaröðina, sem er það sem við tekur eftir tilraunina að komast inn á Web.com. Birgir spilar þá í Lumine Golf & Country Club í Tarragona á Spáni, en það úrtökumót fer fram 2.-5. nóvember n.k.

Það er vonandi að Birgi Leif gangi sem best í báðum úrtökumótunum!