Ragnheiður Jónsdóttir | janúar. 29. 2012 | 16:55

Viðtalið: Magnús Gautur Gíslason, GÍ.

Magnús Gautur Gíslason, 43 ára er félagi í Golfklúbbi Ísafjarðar (GÍ) og með 6,0 í forgjöf.  Hann er mjög sigursæll á golfmótum fyrir vestan og víðar og hefir m.a. sinnt golfkennslu, sem hann segist vera hættur núorðið.  Hér fer viðtalið við Magnús Gaut:

Fullt nafn: Magnús Gautur Gíslason.

Klúbbur: Golfklúbbur Ísafjarðar.

Hvar og hvenær fæddistu?  Ég fæddist 11. desember 1968, á Bíldudal.

Hvar ertu alinn upp?  Ég er alinn upp þar, á Bíldudal, svo líka á Patreksfirði og síðan fluttist ég á Suðurnesin í 3 ár.

Hverjar eru fjölskylduaðstæður og er einhver af fjölskyldunni í golfi?  Ég er kvæntur Sigurlínu Jónasdóttur og á 3 stelpur: Elísabetu Ósk, 20 ára, Melkorku Ýr, 15 ára og sú yngsta, Hrafnhildur Una, 8 ára er í golfi.

Hvenær byrjaðir þú í golfi? Ég byrjaði á árunum 1997-98, svona 29-30 ára og hafði prófað að fara í golf 1-2 sinnum áður.

Hvað varð til þess að þú byrjaðir í golfi?  Mig langaði bara að prófa.

Hvað starfar þú?  Er með fyrirtæki í fiskverkun Stál og Hnífur og starfa með Gunnvör í fiskeldi.

Hvort kanntu betur við skógar- eða strandvelli?    Það er skemmtilegra að spila skógarvelli – hef meira spilað þá erlendis.

Hvort líkar þér betur holukeppni eða höggleikur? Holukeppnin er nú það skemmtilegasta sem maður lendir í, það er meiri keppni um hverja holu og meira í gangi.

Hver er uppáhaldsgolfvöllur/vellir á Íslandi?  Tungudalsvöllur á Ísafirði og Vestmannaeyjar.

Hvaða braut kanntu best við á Tungudalsvelli? Ég á enga uppáhaldsbraut – nema kannski 5. brautina, sem er par-4 og er í dogleg. Hún og er oft örlagavaldur í skori manna. (Innskot: Það kom á óvart að Magnús Gautur skyldi ekki nefna 7. brautina, því þar hefir hann nefnilega 3 sinnum farið holu í höggi).

Hvert er álit þitt á Sjávarútvegsmótaröðinni (Röð 7 móta á Vestfjörðum þar sem 5 bestu telja og sjávarútvegsfyrirtækin á hverjum stað styrkja)? Sjávarútvegsmótaröðin er bara snilld og frábært hvernig þetta hefir þróast. Mótaröðin hefir fært líf í mótalífið. Hún gerir það að verkum að Vestfirðingar þvælast kannski minna annað – þeir vilja vera á staðnum og taka þátt í mótaröðinni.

Geta kylfingar utan Vestfjarða tekið þátt í mótaröðinni? Já, kylfingar utan Vestfjarða getið tekið þátt í einstökum mótum og tekið við verðlaunum í þeim, en þeir geta ekki tekið verðlaun fyrir að vinna mótaröðina í heild. Svona eru bara reglurnar.

Af hverju ættu kylfingar að koma til Ísafjarðar að spila golf? Veðurfarslega er Ísafjörður besti staðurinn á landinu í júlí til að spila golf. Það er ekki til betri staður en golfvöllurinn í Tungudal yfir hásumarið – Það er einkum fallegt umhverfið, veðursældin í dalnum og lognið sem gera Tungudal einstakan.

Hvaða golfvöll (fyrir utan Tungudal) myndir þú mæla með við kylfing sem er ókunnugur á Vestfjörðum og spyr þig hvar hann eigi að spila golf? Ég myndi mæla með að hann spilaði á golfvelli Golfklúbbsins Glámu (GGL) á Þingeyri, Meðaldalsvelli. Það er skemmtilegur 9-holu völlur og 7. brautin (par-3) er svo falleg, en þar er slegið yfir foss. Og svo er líklegt að maður geti verið einn á vellinum, það er fáir að spila þar – þannig að það er svolítið sérstakt að vera með heilan golfvöll fyrir sig.

Hver er uppáhaldsgolfvöllur/vellir hvar sem er í heiminum?   Torrequebrada, Costa del Sol. Það er fallegur völlur.

Hvað ertu með í forgjöf?   6,0.

Hvert er lægsta skorið þitt í golfi og hvar/á hvaða velli náðir þú því?  Ég hef spilað nokkra velli á pari t.d. Tungudal og Bolungarvík

Hvert er lengsta drævið þitt?  Ég hef oft slegið langt – einhvern tímann  rúmlega 350 metra  270-80 voru í niðurhalla og svo  rúllaði boltinn 70 metra.

Hvert er helsta afrekið þitt til dagsins í dag í golfinu?  Ég hef tvisvar farið holu í höggi í Tungudal, sem hefir verið skráð – í bæði skiptin á 7. braut. Svo var það annað skiptið að ég var á 7. braut í Tungudal að ég sjankaði – Ég ákvað samt að taka annan bolta, fór holu í höggi og bjargaði pari. Svo fór ég holu í höggi á Kirkjubæjarklaustri, á vellinum í Efri-Vík. Þar var ég með dætrum mínum að leika mér og fór holu í höggi á 2. braut.  Ég spilaði ekki 18 holur og hringurinn var aldrei skráður.

Hvaða nesti ertu með í pokanum?   Ég er oftast með harðfisk.

Hefir þú tekið þátt í öðrum íþróttum?  Já, körfubolta.

Hver er uppáhaldsmatur, uppáhaldsdrykkur, uppáhaldstónlist, uppáhaldskvikmynd og uppáhaldsbók?  Uppáhaldsmaturinn minn er nautasteik og saltfiskur (panta yfirleitt annaðhvort á veitingastöðum); uppáhaldsdrykkurinn er rauðvín; ég hlusta á flestalla músík; uppáhaldskvikmyndin er „Night on Earth“ með  Tom Waits og uppáhaldsbókin er „Meistarinn og Margaríta“ eftir Mikhaíl Bulgakov.

Hver er uppáhaldskylfingur nefndu 1 kvenkylfing og 1 karlkylfing?    Kk:  Mér finnst gaman að horfa á Couples og Jiménez    Kvk: Ég á engan uppáhalds kvenkylfing… það er erfitt að svara þessu og þó… ég myndi segja Hrafnhildur Una dóttir mín, hún er svo efnileg og miklu betri en ég. (Innskot: Magnús Gautur hefir gott auga fyrir efnilegum kylfingum, því hann kenndi börnum golf um tíma í GÍ þó hann segist löngu hættur að gefa sig í það, en sótti hann á sínum tíma námskeið í golfkennslu á vegum GSÍ.)

Varstu með eitthvað sérstakt „concept“ í kennslunni þinni? Ég lagði sérstaka áherslu á að hafa æfingar fjölbreytilegar og skemmtilegar – hjá mér fengu krakkarnir að skemmta sér en ég lét  þau líka gera almennar íþróttaæfingar; lét þau ekki bara slá og svo var ég ekki að þvælast of mikið með þau í tækniatriðum.

Hefir þú sjálfur verið hjá golfkennara?  Nei, aldrei.

Hvað er í pokanum hjá þér og hver er uppáhaldskylfan þín?   Það er breytilegt hvað er í pokanum hjá mér; ég á nokkur sett og skipti kylfum út. Það sem ég nota mest eru  MP60 járnakylfur og Taylormade Burner,  dræver og tré, sem ég fékk hjá Einari félaga mínum. Svo á ég 3 púttera einn sem ég nota mest er Never Compromize Millet pútter, bara svona venjulegur pútter – svo á ég  STX pútter – og uppáhaldspútterinn er Oystein Jensen… ég hitti manninn, sem pútterinn heitir í höfuðið á, á Tenerife fyrir tilviljun og spilaði nokkra hringi með honum – Hann seldi fyrirtækið sitt, en hann var húsgagnaframleiðandi og framleiddi nokkra  púttera með lógóinu sínu og gaf mér einn – ég nota hann minnst. Uppáhaldskylfurnar eru pútterarnir mínir.

Ertu hjátrúarfullur?  Nei, ég er alveg laus við hjátrú.

Hversu stór hluti golfsins hjá þér telur þú að sé andlegur í prósentum talið?  Andlegi þátturinn skiptir tölverðu máli – ég veit ekki nákvæmlega prósentuna – andlega dagsformið skiptir miklu máli – hvernig maður býr sig undir hringi.

Hver er meginmarkmiðið í golfinu og í lífinu?  Markmiðið í golfinu er að komast sem oftast í golf. Markmiðin í lífinu eru ekkert flókin: maður er að reyna ala börnin vel upp og koma þeim til manns. Það er mikilvægast.

Hvað finnst þér best við golfið?  Mér finnst það er bara útiveran og náttúran í göngutúr sem ér skemmtilegast – að taka áskorunum og labba um í fallegu umhverfi.

Ertu með gott ráð sem þú getur gefið kylfingum?    Að hafa gaman af leiknum.

Ef þú mættir velja 3 kylfinga myndir þú vilja spila með, hverjir væru það – lífs eða liðnir? Það myndu vera Phil Mickelson, Miguel Angel Jiménez og Fred Couples.

Spurning frá síðasta kylfingi sem var í viðtali á Golf1 (efnilegasta kylfingi Íslands 2011, Sunnu Víðisdóttur, GR): Hefir þú farið holu í höggi?

Svar Magnúsar: Já 4 sinnum, en það hefir bara fengist skráð 2 sinnum. (Innskot: sjá hér að ofan).

Getur þú komið með spurningu fyrir næsta kylfing, sem Golf 1 fær í viðtal?

Spurning Magnúsar Gautar:  Heldur þú að þú gætir unnið  Tiger Woods, í dag?