Ragnheiður Jónsdóttir | júní. 26. 2013 | 19:30

Úr ræðu Harðar Þorsteinssonar frá afhendingu styrkja úr Forskoti

Í ræðu Harðar Þorsteinssonar, framkvæmdastjóra GSÍ við 2. afhendingu styrkja úr Forskoti, afrekssjóði kylfinga, í dag, 26. júní 2013 kom m.a. fram að talið sé að um 40.000 Íslendingar stundi golf, eða rúm 10% þjóðarinnar. Af þeim eru 17.o00 félagsbundnir í golfklúbbum og áhuginn er gríðarlegur og fer vaxandi.

Golfíþróttin er þar með 2. vinsælasta íþróttagrein á Íslandi.

Eins hafi orðið vart við að erlendir kylfingar séu farnir að fara í auknum mæli í golfferðir til Íslands, margir erlendir kylfingar spili á stærstu golfvöllunum á hverjum degi yfir sumarið og fer vaxandi enda vellirnir hér fyllilega sambærilegir við það sem gerist erlendis, auk þess sem þeir hafa ákveðna sérstöðu.

Forskot var stofnað í apríl 2012 af aðilum sem í gegnum tíðina hafa stutt dyggilega við bakið á golfíþróttinni: Icelandair Group, Íslandsbanka, Eimskip, Valitor og GSÍ.

Sjóðurinn var stofnaður því mikilvægt var talið að styðja við bakið á afreksfólki í golfi og markmiðið m.a. að búa til reynslu og þekkingarbrunn. Skammtímamarkmið er að koma íslenskum afrekskylfingum á Ólympíuleikana 2016 í Brasílíu en langtímamarkmið að ávallt séu íslenskir kylfingar á stærstu golfmótaröðum heims.

Mikið forvarnar og uppeldisgildi sé fólgið í því að búa til sterkar og góðar fyrirmyndir, en það skili sér til þeirra sem eru að feta sín fyrstu fótspor í golfíþróttinni og hvetji þá áfram.

Í því sambandi minntist Hörður á að skor á Íslandsbankamótaröðinni þ.e. Unglingamótaröðinni væru orðin mun lægri en fyrir nokkrum árum og þau hefðu lækkað verulega undanfarin ár. Nú sæjust margir hringir undir pari í hverju móti, sem hafi verið undantekning fyrir nokkrum árum.

Nefndi Hörður m.a. sem dæmi glæsihring Fannars Inga Steingrímssonar, GHG  upp á 9 undir pari, 61 högg á 2. móti Íslandsbankamótaraðarinnar á Hellu fyrr í mánuðnum.

Eins hefðu íslenskir kylfingar staðið sig vel erlendis m.a. Haraldur Franklín Magnús , GR,  á Opna breska áhugamannamótinu, en hann varð meðal 16 efstu af 288 keppendum og Axel Bóasson, sem varð í 12. sæti á St. Andrews Trophy.  Eins minntist Hörður á Ragnar Má Garðarsson, GKG og Guðmundur Ágúst Kristjánsson, GR, sem hvor um sig sigraði í Duke of York mótinu.

Íslendingar séu sannarlega komnir nær sterku golfþjóðunum – hópur afrekskylfinga orðinn stærri og möguleikarnir meiri að einhver komist í gegn og nái að spila á stærstu mótaröðunum!!!

Til þess að stuðla að því að stutt sé við bakið á okkar bestu kylfingum var Forskot stofnaður en til úthlutunar úr sjóðnum í ár eru 17,5 milljónir og þar af úthlutaðar 15 milljónir til 6 kylfinga.  Færði Hörður f.h. GSÍ loks fyrtækjunum þakkir fyrir stuðning þeirra við golf á Íslandi.