Um sigur Cheyenne Woods

Cheyenne Woods , vinkona og fyrrum liðsfélagi Ólafíu Þórunnar Kristinsdóttur, í Wake Forest vann fyrsta sigur sinn á Evrópumótaröðinni fyrr í dag, þegar hún átti 2 högg á Minjee Lee í efsta sæti á Volvik RACV Ladies Masters í Queensland, Ástralíu.

Fyrir sigurinn fær Cheyenne ekki aðeins $ 57.000,- (þ.e. rúmar 6 milljónir íslenskra króna) heldur fær hún 2 ára undanþágu á LET þ.e. Evrópumótaröð kvenna.

Cheyenne virtist vera með kökk í hálsinum þegar hún hélt sigurræðuna en hún sagði m.a.: „Það hefir verið frábært að spila á Evrópumótaröðinni þetta s.l. ár. Ég hef séð til allra þessara frábæru leikmanna og spilað við liðsmenn Evrópu í Solheim Cup …. að geta komið hingað og keppt við þær og verða á toppnum var gríðarleg stórt fyrir mig.“

Svo mikill var spenningurinn heima fyrir í Bandaríkjunum, þegar ljóst var að Cheyenne ætti möguleika á sigri að Golf Channel sýndi beint frá síðustu tveimur klukkustundunum af mótinu, en miklu sjaldgæfara er að sýnt sé frá viðburðum í kvennagolfi.

Ekki liggur enn fyrir hvað nákvæmlega var í sigurpoka Cheyenne, en hún er líkt og frændinn frægi með auglýsingasamning við Nike og lék því með Nike poka, í Nike fatnaði og með Nike kylfur og bolta.