Ragnheiður Jónsdóttir | október. 18. 2013 | 06:45

Sigurpáll nýr íþróttastjóri Kjalar

Golfklúbburinn Kjölur í Mosfellsbæ hefir ráðið Sigurpál Geir Sveinsson, sem nýjan íþróttastjóra hjá sér.

Þannig segir í fréttatilkynningu frá Kili:

Golfklúbburinn Kjölur í Mosfellsbæ hefur gengið frá ráðningu Sigurpáls Geirs Sveinssonar í starf íþróttastjóra við klúbbinn.
Sigurpáll mun annast skipulagningu á þjálfun og afreksstarfi golfklúbbsins auk kennslu afrekshópa. Samningurinn sem gerður er til þriggja ára var undirritaður nú í kvöld á lokahófi afreksshópa fyrir árið 2013 þar sem Sigurpáll var kynntur fyrir hópnum.

Ráðning Sigurpáls er liður í endurskipulagningu á afreksstarfinu hjá klúbbnum. Íþróttastjóri mun vinna þétt með afreksnefnd klúbbsins að stefnumótun og uppbyggingu í starfinu.
„Það hefur verið aukning í unglinga og afreksstarfinu hjá Kili, og það kallar á aukið vinnuframlag. Heilsárkennsla hefur verið hlutastarf undanfarið árið og teljum við þörf á að bæta í, þá sér í lagi hvað varðar skipulagningu, að framfylgja afreksstefnu o.þ.h.
Með starfi íþróttastjóra mun einnig fylgja aðkoma að stefnumótun afreksstarfs og skipulagningu á allri kennslu klúbbsins. Það er öflugt teymi sem vinnur að afreksstarfinu hjá okkur og það er hugur í mönnum“ segir Guðjón Karl Þórisson formaður Golfklúbbsins Kjalar.

„Einar Lyng hefur sinnt kennslu afrekshópa í hlutastarfi yfir vetrarmánuðina og leyst það verkefni með ágætum. Færum við honum bestu þakkir fyrir samstarfið og óskum honum velfarnaðar í komandi verkefnum.“ segir Guðjón.

Sigurpáll er margfaldur Íslandsmeistari einstaklinga í golfi og á að baki íslandsmeistaratitla með golfklúbbnum Kili í sveitakeppni. Reynsla hans mun án efa nýtast verðandi afrekskylfingum okkar vel í framtíðinni.

Fyrir hönd stjórnar Golfklúbbsins Kjalar,
Guðjón Karl Þórisson
Formaður