Ragnheiður Jónsdóttir | nóvember. 16. 2013 | 13:00

Rose og GMac gefa Rory ráð

Rory McIlroy hefir átt hræðilegt ár á golfvellinum, eins og allir vita, í ár. Hann er t.a.m. dottinn úr 1. sæti heimslistans niður í 6. sætið.

En ekki bara það, hann var nr. 1 á peningalista Evrópumótaraðarinnar í fyrra, en nú er hann bara í 46. sætinu.

Nú, eftir 3 spilaða hringi á DP World Championship, er hann í 8.-10 sæti af 60 þátttakendum, móti þar sem hann á titil að verja og ætlaði að slá sér upp svona í lok árs, með sigri.  7 högg munar á Rory og Henrik Stenson, sem leiðir í mótinu.

Justin Rose hefir hins vegar trú á Rory. „Að vera með jafnvægi í lífinu hefir áhrif á hvernig golf er spilað,“ sagði Rose og bætti við „Það er erfitt að hafa gott tak á málefnum sínum;  við ættum öll að gera okkur grein fyrir því og það sem ég vinn virkilega mikið að í golfinu og lífinu er að skapa jafnvægi en það er ekki alltaf auðvelt.“   Síðan sagði Rose um Rory: „Hann hefir alltaf átt tímabil þar sem hann hefir ekki spilað sérstaklega vel, en allt í einu, búmm er hann óstöðvandi. Ég hef engar áhyggjur af honum.“

GMac (Graeme McDowell) tók undir með Rose og sagði m.a.: „Þegar maður er með jafnvægi í lífinu, þ.e.a.s. utan golfvallarins, þá léttir það á huga og líkama og maður fer að standa sig.  Ég tala af eiginn reynslu. Þegar allt er í lagi utan vallar er ég mun ánægðari á vellinum.“

Að hafa jafnvægi á hlutunum er ráðið góða sem vinirnir gefa Rory og það er nokkuð sem fleiri kylfingar mættu vinna að!