Nýju stúlkurnar á LPGA 2018: Samantha Troyanovich (18/49)

Það voru 49 stúlkur sem hlutu spilarétt á LPGA mótaröðina 2018 í gegnum lokaúrtökumót LPGA sem fram fór á LPGA International vellinum í Flórída dagana 28. nóvember – 3. desember s.l.

Það voru 29 sem hlutu takmarkaðan spilarétt og 20 efstu stúlkurnar sem hlutu kortið sitt á LPGA þ.e. fullan þátttökurétt í öllum mótum LPGA 2018.

Venja hefir verið undanfarin ár að kynna „nýju“ stúlkurnar á LPGA og líkt og áður verður byrjað að kynna þær sem rétt sluppu inn á mótaröðina og hlutu takmarkaðan spilarétt endað á þeirri sem sigraði í lokaúrtökumótinu, en það var japanska stúlkan Nasa Hataoka.

Nú verða kynntar þær 13 stúlkur, sem deildu 32. sætinu og hlutu takmarkaðan spilarétt og í dag verður Samantha Troyanovich kynnt, en tólf fyrstu stúlkurnar, Brittany Marchand og Maude Aimee Leblanc frá Kanada, Sophia Popov frá Þýskalandi, Martina Edberg og Camilla Lennarth frá Svíþjóð, Vicky Hurst, Jennifer Hahn, Alexandra Newell og Lori Beth Adams frá Bandaríkjunum, Wichanee Meechai og Pannarat Thanapoolboonyaras frá Thaílandi, og Dottie Ardina frá Filippseyjum, hafa þegar verið kynntar.

Samantha Troyanovich fæddist 28. október 1989 og er því 28 ára.

Hún er frá  Grosse Pointe Shores, í Michigan.

Troyanovich lék í bandaríska háskólagolfinu á árunum 2008-2012 fyrir „The Green Waves“ þ.e. kvennalið Tulane háskóla í Louisiana.

Frá árinu 2015 hefir Troyanovich verið á Symetra Tour og hefir nú (2018) takmarkaðan spilarétt á mótaröð bestu kvenkylfing heims, LPGA.