Ragnheiður Jónsdóttir | janúar. 26. 2018 | 18:00

Nýju strákarnir á Evróputúrnum 2018: Sebastien Gros (19/33)

Það voru 33 kylfingar sem tryggðu sér keppnisrétt á Evrópumótaröðinni í gegnum lokaúrtökumót Evrópumótaraðarinnar, sem fram fór dagana 11.-16. nóvember sl. á Lumine golfstaðnum á Spáni.

Það voru 25 efstu og þeir sem jafnir voru í 25. sætinu, sem tryggðu sér keppnisrétt.

Nú hafa verið kynntir þeir 9 sem deildu 25. sætinu og rétt sluppu inn á Evróputúrinn verið kynntir.

Í dag verður kynntur sá síðasti af þremur sem deildu 15. sætinu á samtals 15 undir pari, hver, en það voru Sebastien Gros frá Frakklandi; Nico Geyger frá Chile og Ross McGowan, frá Englandi.

Ross McGowan og Nico Geyger hafa þegar verið kynntir og í dag verður Sebastien Gros kynntur.

Sebastien Gros fæddist 8. nóvember 1989 og er því 28 ára. Hann veit það líklegast ekki en hann á sama afmælisdag og Heiðar Davíð Bragason, nýráðinn yfirgolfkennari GA og thaílenski kylfingurinn Thongchai Jaidee.

Gros er 1,81 m á hæð og 73 kg.

Gros hóf að spila golf með afa sínum 10 ára og á unglingsaldri var hann ákveðinn í að verða atvinnumaður í golfi. Það varð hann síðan líka í árslok 2011, eftir að hafa unnið 4 mót sem áhugamaður í Frakklandi.

Gros spilaði síðan á Alps Tour í 2 ár og vann tvívegis þar.

Árið 2014 var Gros á Asítúrnum og missti af því að komast á Evróputúrinn gegnum lokaúrtökumót mótaraðarinnar með 1 höggi.

Hann spilaði því aðallega á Áskorendamótaröð Evrópu 2015, þar sem hann sigraði tvívegis þ.e.  Kazakhstan Open og Najeti Open og komst á Evróputúrinn 2016 eftir að hafa orðið í 2. sæti á stigalista Áskorendamótaraðarinnar.  Árið 2015 varð hann m.a. í 4. sæti á Alfred Dunhill Links á Evróputúrnum.

Árið 2016 lék Gros í 26 mótum á Evróputúrnum – komst í gegnum niðurskurð í 11 þeirra og var besti árangur hans T-10 á Irish Open og var þetta eini topp-10 árangur hans. Árangur Gros 2017 var svipaður – hann lék í 26 mótum á Evróputúrnum og komst í gegnum niðurskurð í 12 og varð að fara aftur í lokaúrtökumótið í árslok 2017 – þar sem hann landaði eins og segir 15. sætinu og spilar því á að nýju á Evróputúrnum 2018.

Sem stendur er Gros nr. 1203 á heimslistanum.